Don-Dresaka Tv Plus 26 Septambra 2015

Olana iainana isanandro ny fahatapahan’ny herinaratra. Marina fa misy manerana ny tany ny toy izany, toy ny atsy Libanona, Afrika, sy faritra hafa. Fa ny f'(h)erin’ny tena aloha no tsapa ho maharary, ka izay no ifantohan’ity lahatsoratra ity androany.

Marobe isika no mpanaraka ny fandaharana « Don-Dresaka » ao amin’ny fahitalavitra Tv Plus Madagascar. Betsaka no nifampiantso an-telefaona fa hoe hiakatra sehatra indray ny resaka ‘delestage’ izay mampikaikaika ny maro (olon-tsotra, mpandraharaha,…). Tsy vitsy ny mikamenona sy manandratra ny feony ety anivon’ny serasera ety. Nisy mihitsy aza ny famoronana vondrona « Mpanjifa Jirama« .

Misy ny miantso fihetsehana, saingy hatreto aloha dia mbola ny Wake Up Madagascar no hany sahy nirotsaka niseho an-dalambe naneho ny fanoherany ity fahatapahan-jiro sy rano isaky ny mahatsiaro ity raha ny teto Antananarivo no resahana, ny ankoatra izay dia manao adin’akoholafy fantaka fotsiny ihany sy vovòn’alika mahery an-tanàna, fa vao anangonan’ny olona vato, dia ny rambo no arovana alohan’ny zavatra hafa rehetra.

Santionany amin’ny fanehoankevitra any anaty tambajotra sosialy itony

Efa miala any ny insécurité, fanafihana teny Isotry tao anatin’ny délestage. Sa vé andrasana misy maty maromaro fa Tamin’ny ity mbola karana 1 ihany aloha vao soit ahita solutions ny fanjakana soit hihetsika raMalagasy? Grrrrr !

Voakiana betsaka tamin’izany fahatapahana izany ireo mpiasa, izay tsy sasatry ny nitondra fanazavàna hoe tsy avy amin’izy ireo velively ny antony mahatonga ny fahatapahana, ary ho fitsinjovany ihany koa antsika mpanjifa no nanaovany ny hetsika, satria tsapany fa misy fitaka bevava hanaovana izay hahaosa ny orinasa ao anatin’ilay resaka fiarahana miasa amin’ny Symbion, anton’ny nanaovany fitokonana.

Dia ny tian’zareo tenenina izany dia hoe : Midina mankeny mihintsy ny filoha sy ny minisitra manapaka ny jironay in-3 isan’andro???? Toa mahagaga izany a! Sa ve oe sarim-bavy daholo ny mpiasan’ny JIRAMA sasany ?

Anga congé ny mpiasan JIRAMATY androany f to tsis délestage

Izany anefa tsy entina hilazàna fa hoe ny mpanjifa rehetra no manenjika ny mpiasa, fa mba misy amintsika ihany no mahatakatra hoe tsy fidiny azy ireo ny manjo azy

  • Nirina RakotonarivoNirina Rakotonarivo JIRAMA=SOLIMA, efa raikitra ny zarazarao hanjakana e!! ho ela velona ny SYMBION, ENELEC, HENRI FRAISE, AGRECO sns… mbola hoavy koa ny vérité de prix fa aza mikorapaka e!!! io ny santionany rehefa tsy maharaka ny solika sy ny vola homen’ny fanjakana ireo orinasa vahiny ireo @ fotoana hilany azy dia maizina isika rehetra, tsy misy mitsinjo vahoaka izany eo nge e!

Tsetsatsetsa tsy aritra: ilay resaka ENELEC (karàna) no isan’ny nametraka ny resaka groupe WARTSILA tamin’ny taona 2007, ary mitohy mitsentsitra io orinasa io hatramin’izao, ankoatra ireo hafa mpiara-mahazo tombontsoa aminy.

Mi 2007, ENELEC a commencé à installer des centrales thermiques au fuel lourd et fournit désormais plusieurs grandes villes de Madagascar à travers le réseau de la JIRAMA que sont Antsiranana, Majunga, Tamatave et Toliara en s’appuyant sur les technologies fiables de la marque de la firme finlandaise WARTSILA avec sa gamme de générateurs Wartsila 20 et Wartsila 32.

Tsy hiverenana hotanisaina eto ireo fepetra sy famoretana samihafa nitarainan’ireo mpiasa ireo nandritra izay fitokonana nataony izay (resaka Baomba, EMMOREG, fandrahonana samihafa…) fa ny vao haingana indrindra niarahan’ny rehetra nahalala dia ny fampidirana am-ponja mpiasa 2 avy tamin’ireo mpitarika ny fitokonana. Andro maromaro talohan’io indray kosa no efa nisy andianà mpiasa nilaza ny fahavononana hiaraka hiasa amin’ny amerikàna hampihodina ny toby fihariana herinaratra ao Mandroseza.

Tamin’iny herinandro vao nifarana iny dia nanao fanambaràna fifarànana fitokonana ireo sisa ambiny. Nipetraka tao anatin’ny maro ny fanontaniana hoe : ‘Natahotra ve sao voa toy iretsy 2 voalaza teo aloha?-  Voatampina ve ny maso ka nangina?  Azo ve ny nilaina? sns… Santionany tamin’ny fanontaniana nibosesika tao an-tsain’ny maro ireo.

Rehefa nandre àry ny maro fa hiakatra sehatra indray hitondra fanazavana ny mpiasa nanao ny fitokonana, ho ao amin’ny fahitalavitra, fandaharana « Don-Dresaka », dia maro no liana, niandry…niandry…kanjo indrisy fa tsy nisy. Nikaroka tany anaty Youtube, fa tsy nahita.

Araka ny fitrandrahana tetsy sy teroa, dia toa nahazo fiantsoana hitondra fanazavana momba izay antony nifampiresahany tamin’ireo ao amin’ny intersendikaly ingahy minisitra. Taorian’izay dia tonga ny teny midina ‘avy any ambony’ nilaza fa tsy azo atao indray ilay fandaharana, tamin’ny ora farany.

Tsy hiresaka izay « demaokrasia…demaokrasia » fitanisan’ny maro aho eto, satria amin’ny sasany izy io midika fahalalahana maneho hevitra, amin’ny hafa indray midika ho fanaovana izay tiana hatao, ary ho an’ny Baroa dia midika ho ‘tsy misy bedy‘. Ialako lavitra araka izany ny hamaritra ny dikany ho anao mpamaky. Fa izay tiako, mpanoratra, hiampita aminao dia ity: Fanjakàna Polisy ve no misy eto amintsika sa Fanjakana Mpiahy? Anao no mamaly izany

Iarahantsika rehetra manaiky angamba fa lasa resaka mampizarazara ny fomba fijerin’ny rehetra ity resaka JIRAMA ity, nefa aoka ho tsaroantsika rehetra fa tsy biby fampitahorana ny mpitondra, fa isika no mampindrana azy ireny ny fahefana, manomboka amin’ny filoham-pirenena ka hatramin’ny tafika sy ny zandary ary ny polisy. Raha isika vahoaka no hifanakiana sy hifampitsikera lava eto, dia milalao ny lalaon’ireo mpitondra sy ny mpiara-dia aminy isika, ary izay indrindra aza no tanjona ezahany tratrarina mba hahafahany manao izay tiany hatao eto amin’ity firenena ity: ny vahoaka difotry ny fifampitsikerana sy ny tahotra, ry zareo miasa any ambadika amin’ny fitsentsefana sy ny fambotriana. Tianao hitohy ve ny tahàka izany?

Entina hamaranana azy ity, dia indro ny fehiny mahalaza tsara ny fihetsiky ny maro amintsika

Ny sahaza antsika dia mimenomenona eto amin’i Facebook momba ny délestage, izay no haintsika (izaho koa tafiditra anatin’izany) dia rehefa tapaka ny jiro ka tsy mandeha ny ADSL na low bat ny finday dia ajanona kely ny fimenomenomana. Dia mitohy indray avy eo. Faible loatra isika (izaho koa) ka tsy hahavita hidina an-dalambe ! Hendry loatra sa faible … ?

#WakeUpMadagascar #Anosy 06122014

Nanentana antsika ho tonga haneho ny tsy fahazakàna ny zava-misy iainana isanandro efa mila hahasempotra ny Wake UpMadagascar. Tsy nampitsanga-menatra azy ireo ny isan’ny olona namaly ny antso na tsy voahodidina tanteraka aza ny farihy.

DSC_0054

Mety hoe kely angamba hoy ny nahita, saingy inoana kosa fa tafita ny hafatra. Tsara fidy rahateo ilay toerana teo anoloan’ny fiatoan’ny taxibe Anosy, akaikin’ny tranon’ny fampielezampeom-pirenena #rnm.
DSC_0075

Araka ny lahatsoratra nalefa ho anao mpamaky, talohan’ito, dia isan’ireo vahiny efa nandrasana teny an-toerana ny polisy (tsy dia tiako intsony ny mampiasa ilay fiteny hoe mpitandro filaminana #EMMO, raha mbola ny eto an-tanàna no resahana), nalefan’ireo mpifehy (ho solon’ny hoe mpitondra koa io).

DSC_0066

DSC_0077

Fa maninona tokoa moa no ataoko hoe « mpifehy » ?

Mpifehy satria dia tena miezaka tokoa mifehy sy mitazona ny vahoaka ho eo ambanin’izay fifehezany izay. Anisan’izany ny resaka fifehezana ny serasera izay tsy nanjary mihitsy nanomboka omaly, nitohy hatramin’ny aninkeheo maraina, ary niverina tsara indray rehefa vita soa aman-tsara ny hetsika teny Anosy.

Vita soa ny androany ho an’ny WUM.  Ary isaorana ireo tonga nijoro tamim-pahasahiana. Sahy haneho ny heviny, sahy hanaitra amin’ny zavatra tsapany fa mila amboarina mba hanarenana ny fireneny. Tsy nanan-tahotra mba handefa hafatra ho an’ireo « mpifehy » hilaza amin’izy ireo fa misy ny olana tokony hovahàna.

DSC_0030

Ary ianao , mba ahoana?

Olom-pirenena manana hevitra ve ianao? Olom-pirenena mahatsapa fa misy mangidy tsy telina zakainao, na tsy isan’andro aza, fa matetika? Ataovy izay mba azonao atao hanarenana an’i Madagasikara. Tsy hiandry lava ny sasany hanao izany amin’ny toeranao ka hifanipitsipy andraikitra. Ny hoavinao, ny hoavin’ny taranakao no jereo.

DSC_0031

Androany dia ny resaka fahatapahan-jiro sy rano (#delestazy #jirama) no tena hita nisoratra betsaka tamin’ireo takela-taratasy nolanjain’ireo mpandray anjara, saingy tsy voafetra ho amin’izany ihany ny hetsika #WUM tahaka izao raha ny fahafantarako ity hetsiky ny olom-pirenena miainga avy ao amin’ny Facebook ity. Azonao atao tsara ny maneho endrik’olana hafa ankaotra izay.

DSC_0063

Aoka izay ny bla bla lavabe fa aleo mba hijery sary ary isika e! Mankafiza

DSC_0065

 DSC_0032

DSC_0037

DSC_0038

DSC_0041

DSC_0059

Fampanginana ny #WakeUpMadagascar – Fanampenam-bava Ny Serasera

Ny rehetra no nahamarika fa hatramin’ny omaly efa alim-be (05 Desambra 2014) dia faran’izay nanahirana tokoa  ny niditra tamin’ny tontolon’ny serasera (ny #TELMA #Moov aloha no tsikaritro, fa tsy haiko ny tambajotra hafa). Ny alina tokoa mantsy no mba afaka manokana fotoana betsaka kokoa hanarahana izay mitranga sy hifaneraserana ny ankamaroan’ny vahoaka.

Rehefa nifoha io maraina io indray dia izao no zavatra tsikaritra: afaka miditra amin’ny tontolon’ny aterineto ianao, saingy nobahanana ny fidiranao amin’ny #Facebook (tsy tapaka tanteraka fa nohasarotina). Marihako mihitsy hoe ny fidirana amin’io sehatra iray io no nobahanana (niniana amiko fa tsy hoe antony ara-teknika) satria izay tambajotra hafa rehetra fampiasako isanandro (mavesatra lavitra noho ny FB aza) dia azo nidirana vetivety daholo.

Tahotra:

Efa andro maro ihany koa no niarahan’ny rehetra nahafantatra ny fisian’ny fanentanana nataon’ny #WakeUpMadagascar ho an’ny olom-pirenena rehetra tsy ankanavaka, mba ho avy hanao tohivakana manodidina ny farihin’ #Anosy haneho ny tsy fahazakàna intsony ny fahatapahan-jiro sy rano #JIRAMA manjo matetika ny vahoaka. Sady ho fanairana ihany koa ny mpitondra momba ny hirifiry zakain’ny vahoaka.

Raha ny lamina tany aloha (izay tsy nisy fanovàna hatreto) dia anio Sabotsy 06 Desambra 2014 amin’ny 10 ora no hanaovana izay tohivakana izay. Kisendrasendra angamba hoy ianao no nifandrifian’ireo rehetra ireo. Tsia kosa anefa hoy aho!

Tsy kisendrasendra ny fibahanana ny fidirana Facebook (FB) nanomboka omaly Zoma, nitohy androany Sabotsy. Hetsika niainga avy tao anaty FB ny Wake Up Madagascar. Tsy vitsy ny olona no nahita ny hafatra (na dia tsy nilaza mivantana ny heviny teo amin’ilay pejy aza). Nifampizaràna rahateo tany anaty vondrona (groupes) isankarazany tany ny fisiana sy ny antom-pisian’ilay hetsika, izay efa nomarihana fa hatao am-pilaminana. Nasain’ny mpikarakara ny hetsika mihitsy aza ny EMMO mba ho tonga eny an-toerana ka hamerina ny olona izay midina anaty arabe, hiverina hiakatra eny ambony trottoir natao ho an’ny mpandeha an-tongotra. Tanjona amin’izany ny tsy hanelingelenana ny fifamoivoizana sy ny hahitàna izay miketrika korontana.  Tsy kisendrasendra, hoy aho, ilay fibahanana satria atahoran’ny mpitondra fanjakana fa sao mbola ho be no hahita ny hafatra ka ho avy hamaly ny antso; atahoran’ny fanjakana fa sao tena ho sahy hatramin’ny farany tokoa hiroso hanatanteraka ny hetsika ireo mpikarakara; atahoran’ny fanjakana fa sao ho vanja handrehitra ny afon’ny lonilonim-bahoaka efa nihotrika ela io.

Lonilony mihotrika:

Efa ela tokoa ny vahoaka no nilaza fa leo, efa ela no niaritra mangina, ary malaza loatra amin’ny fahendrena sy fahaizana miaritra ‘treffle’ amin’izay rehetra mitranga. Hatramin’izay anefa dia nifori-dava tsy niteny, ary samy nahita ireo rehetra nifandimby nitondra ity firenena ity, fa rehefa io vahoaka niaritra ‘trefle’ io no mitroatra, dia efa ratsy izay no fiafaran’ny tantara. Koa io loinilony nihotrika ela tany anaty fiarahamonina io no heveriko (izaho manoratra) ho antony iray nanosika ny Wake Up Madagascar hanaitra ny sain’ny maro. Io lonilony nihotrika ela io no mbola heveriko fa tian’ny mpifehy hampanginina mba tsy hihitatra lavitra fa sao hanapaka ny tongon-tsezany; io lonilony nihotrika ela io no mbola eritreretiko koa ho ao ambadiky ny fibahanana ny FB manjo ny maro nanomboka omaly ka mitohy androany.

Fomba hafa:

Entaniko ianareo rehetra izay afaka manao izany mba hikarokaroka sy hifanontany, hitady fomba hafa hifampizaràna vaovao sy fanentanana, satria misy tokoa izay fomba hafa izay, izay tsy hotononiko eto fa sao dia hosakanany eo koa sanatria. Tsy hoe manentana anao hanatrika ny hetsika androany akory no tanjoko amin’ny fanoroana anao hoe misy fomba hafa, fa fanoroako anao hoe « Zonao ny hahalala vaovao, zonao ny ho afaka hikaroka sy haharay izany vaovao izany », ka ny fanakànana anao toy izay mitranga ankehitriny tsy ho afaka hanatrika na miserasera amin’ny manodidina anao, dia fanimbazimbàna ny zo fototra omen’ny lalam-panorenana anao. Koa raiso fa « Anao ny fitenenana »

Fomba fanao:

Tsy i Madagasikara akory, na ny Wake Up Madagascar, no voalohany nampiasa ny fomba fanaovana tohivakan’olombelona mba ho fanehoana AM-PILAMINANA ny tsy fahafaliana, na ho fanairana. Firenena maro maneran-tany no efa nanao izany, vahoaka maro sesehena no efa nampihatra izany, ary isan’ny vahoaka iharan’ny tsy fetezan-javatra ihany koa na ny mpitandro filaminana aza, ka dia namela ireny hetsika ireny hizotra am-pilaminana. Tsy voatery hanao herisetra akory vao ho fantatra fa hoe NIHAINO NY VAHOAKANY NY MPIFEHY.

Avylavitra (http://mg.globalvoicesonline.org)

 

TEDxAntananarivo : Nitsoaka an-daharana #Ambatovy

Lahatsoratro voalohany eto amin’ny bilaogy ity, raha ny resaka #TEDxTNR, na TEDxAntananarivo andiany faha-efatra kasaina hatao amin’nhy Sabotsy 1 Septambra no ho asian-teny. Hetsika diso fantatra loatra maneran-tany ary manana ny toerany manokana amin’ny fifampizaràna fahalalana sy fitondrana anjara biriky amin’ny resaka fampandrosoana, miainga avy amin’ny isam-batan’olona mihitsy.

Hetsiky ny tsy miankina ny TEDx, takaro amin’ny hoe ‘olon-tsotra’ ilay tsy miankina tiana hiampita, izany hoe tsy an’ny fanjakàna. Amin’izay lalan-jotra izay dia soavaly mianto-bilona ny hetsika iray manontol, ka fifanohanana sy fifanampiana no entina manatanteraka azy. Efa nisy ireo nanolo-tena an-tsitrapo nitondra ny fahaiza-manaony tamin’ny lafiny maro, ary misy koa ireo nilaza fahavononana hitondra anjara biriky amin’ny fandaniana ara-bola, toy ny fanofàna ny trano, ny fanapariaham-peo sns….Isan’ireny naneho fahavononana ireny ny orinasa #Ambatovy.

Fa nisy inona?

Be ny resaka mandeha etsy sy eroa mikasika izay antony nampihemotra ity orinasa ity, tafiditra amin’izany ny fangatahana ‘mimi’ ataon’ny sasany any ambadika any, araka ny hita voasoratra an-gazety. Tsetsatsetsa tsy aritra no ilazana fa tao amin’ny radio #Antsiva aza moa dia voalaza fa volan’ny #JIRAMA no entina hanatanterahana ny fampanantenana hanaovana Tempolin’ny #Rugby eny #Andohatapenaka. Marina ve sa tsy marina? Izahay tsy mahalala, ianareo koa mety tsy ho afaka hanoro, fa ny zavatra hita aloha ary efa fantatra dia ny fisintahan’Ambatovy tsy hanohana ny hetsika.

Misy ihany anefa ny fomba azon-tsika tsirairay hanamaivanana ny fandaniana, ankoatra izay mbola ho hetsika hataon’ny malala-tànana, dia ny fividianana ny tapakila fidirana amin’io hetsika hatao ao amin’ny #Carlton amin’ny Sabotsy io. Azonao vidian mialoha amin’ireto toerana ireto izany: Urban Café ao Antsahabe, Chill’Out etsy Ambondrona  ary ny Outcool Ampasamadinika.

Fa inona tokoa moa ilay TEDx e? Avy amin’ny hoe Technology, Entertainment, Design no nafohezina nakàna azy. Foto-kevitra ijoroany ny hoe Hevitra Mila Zaràina. Tsy hoe izay te-hizara hevitra rehetra anefa fa izay hevitra mitondra soa sy fandrosoana ho an’ny mpiara-belona no ifampizaràna mandritra ny hetsika TEDx.

Ny irariana dia ny hoe mba hahitàn’ny mpikarakara malala-tànana hafa hanohana ny TEDxAntananarivo, ilay hetsika tanora Malagasy azo lazaina ho reharehan’i Madagasikara eran’izao tontolo izao. Angamba mety tsy mbola fantatrao izany tanora izany sy ny ekipa mifanohana aminy, nefa aleo lazaina aminao aq malaza eran’izao tontolo izao izany anarana hoe Harinjaka Ratozamanana izany, raha tsy heno loatra kosa eto amin’ny sehatra anatiny. Izy no tompon’ny licence TEDx eto Madagasikara, ary mazava loatra fa avy amin’ny alàlany sy ireo nanohana azy no nikarakarana ilay hetsika goavana be tamin’ny TEDx Antananarivo andiany fahatelo niresahana mimba ny Homamiadana manjo ny vehivavy aty Afrika, natao teny amin’ny CCI Ivato.

Tongava hanotrona ny TEDxAntananarivo fa tsy hanenenanao ny hihaino ireo mpandray fitenenana maro ho tonga ao, izay Malagasy toa ahy sy ianao ihany koa

Lahatsoratra hafa miresaka momba ny TEDxAntananarivo ireto:

Nahoana no niala Ambatovy?

TEDx Antananarivo : Ambatovy le 1er sponsor se étire au dernier moment!

 

Raharaha JIRAMA vs CUA : Valintenin’ny Ministeran’ny Rano

Rehefa nanao fanairana (teny Soanierana) ny mpiasan’ny JIRAMA omaly 23/08/2012 , dia nahazo fiantsoana ho eny Ambohitsorohitra ireo mpitarika. Taorian’izany rehetra izany dia nivoaka ity taratasy ity

NAZA Electronic Tsaralalana

Nisy zava-nipoaka androany teo anelanelan’ny fiara iray sy ny fitaratry ny tranoben’ny NAZA Electronic Tsaralalana. Tsy lavitra ny SEIMAD no misy an’ity toerana ity. ary misy toerana fiandrasana fiara fitaterana iraisana tsy lavitra eo.

Vaky ny fitaratra tamin’ny NAZA Eletronic, ary tsy dia naninona kosa ilay fiara. Olona iray no voalaza fa naratra teo amin’ny tongony havia raha teo am-pividianana vata fampangatsiahana sy nijery auto-radio tao amin’ity toeram-pivarotana lehibe ity.

Hatreto dia tsy misy zavatra betsaka holazaina fa ny zavatra iray sendra mandalo ato an-tsaina dia ny amin’ilay nolazaina fa baomba iray tsy nipoaka saika hanimbàna zavatra teny amin’ny toby fampidiran-dranon’ny JIRAMA Mandroseza. Faritra be mpandalo ve ilay izy, ary raha tsia, ahoana no nahitàn’ny mpitandro filaminana azy sy nahafahany nanao izay tsy hipoahany? Fanontaniana iny? Hisy valiny ve? Tsy fantatro…..

Fa hiverina momba ny zavatra tetsy Tsaralalàna isika. Mahagaga ny fahasahian’ny olona an, tsy ilay hoe hanapoaka no tiana horesahana, fa ilay tia mijerijery sy mizaha ny zava-misy na nitranga, nefa zava-mipoaka no resaka eto. Raha izany moa no sanatria ka mbola nisy niafinafina tsy nipoaka tany ho any, fa niandrasana ny hahabe ny olona fotsiny vao narefotra, dia angamba ho zava-doza noho ilay hoe iray no naratra.

ireto ny sary azo teny an-toerana androany.

ilay fiara nanoloana ny fitaratra ben’ny tranon’ny NAZA

Ny fahasinban’ilay fitaratra

ireo kiriana mijery ny zava-misy. Rha izao moa no sanatriavina ka…..!

Misy camera de surveillance eo ambanin’ilay ‘N’, nahafahana nahita izay nametraka ilay zava-nipoaka (araka ny heno dia toa efa nisy ny voasambotra)

tokony ho hatraiza moa no atao hoe Périmètre de sécurité?

iray amin’ireo fiara vaovao natolotra ho an’ny mpitandro filaminana

Loza raha may ny ala kely … farihin’i Mandroseza

Tsy nisy andro iray tsy nandrenesana anjomara fanairan’ireny fiarabe mpamono afo ireny teto Antananarivo. Na andro na alina dia tsy maintsy mandre azy ireny foana ny mponina. Toa zary lasa fahazarana mihitsy indray aza angamba, mba tsy hilazana hoe lasa tsy mahataitra.

Fiaraben'ny mpamono afo

Toa mampahatahotra ny hiteny hoe efa misy tia milalao afo sy faly mahita zavatra may koa ve ny Malagasy (pyromane)? Teo aloha teo mantsy dia tsy nisy tsy taitra nandre fa may ny ampahany tamin’ny valan-javaboahary voajanaharin’Ankarafantsika, nanaraka azy avy eo ny valan-javaboaharin’Isalo. Tsy hoe adino akory ny « hain-trano faobe » mitranga eto an-drenivohitra, toy ny teny Antohomadinika, raha tsy hiresaka afa-tsy io isika.

Tamin’ireny tranga ireny dia saiky tonga nidodododo sy nihazakazaka nijery ny zava-nitranga sy hoe « hitondra anjara biriky » ny olona isan’ambaratongany. Fa raha ity nitranga androany ity kosa no lazaina, dia tena nampalahelo: May ny ala kely (mbola tamin’ny ampahany ihany aloha) manodidina ny farihin’i Mandroseza. Ampahany hoy aho, nefa tsy azo tsinontsinoavina ny haben’ilay faritra may. satria lehibe ihany.

Kely fa zava-doza raha avela hihanaka

Hoy ny manodidina

Tokony ho tany amin’ny 8 ora sy sasany maraina tany  no tonga teo niaraka tamina fiara 404 misy labasy ny olona vitsivitsy. Anton-dian’izy ireo ny handoro  antontan-taratasy am-patorana teo anatin’io faritra io. izay efa fanaon-dry zareo isaky ny andro sabotsy.

ireo antontan-taratasy nodorana nefa tsy may

Nilaza moa ireo mpiasa sendra ny tena teo amin’ilay toerana nisy ny fahamaizana fa tsy amperin’asa izy ireo no nisy niantso tamin’ny finday fa hoe

mirehitra ny ao anatin’ilay faritry ny ala kelin’ny JIRAMA.

Dia ho aiza izany ireo tarondro be teto?

Ary dia tonga nanohina ny antso tsy nisalasala. Na dia faran’ny herinandro tokony hialan-dry zareo sasatra sy hirevireveny aza (tsy afenina fa efa nahazohazo avy any amin’ny faritra nisy azy tokoa ny sasany tamin’izy ireo no tonga namaly ny antso).

Ankoatra ahy izay naharay antso avy amin’ny anabaviko monina eny amin’ny faritra akaikin’ny afo, dia nisy efatra teo ho eo angamba ireo mpiasa nijery ny fihanaky ny afo. Tsy fantatro na ny mponina  na ireo mpiasa no niantso voalohany ny mpamono afo. Tsy haiko na tamin’ny firy ireto mpiasa ireto no tonga teo an-toerana fa raha ny tamin’ny 2 ora sy sasany tolakandro nahatongavako teny dia tena mbola teo amperiny tamin’ny famonoana ny afo tokoa ny avy ao amin’ny mpamono afon’ny kaominina.

Raha ny teny heno avy amin’ireo mpiasa nanontaniana moa dia hoe tsy avy amin’ireo fako sy antontan-taratasy nodorana no niavian’ny afo fa avy amin’ny faritra ambany, akaikin’ny rano. Toerana izay lazain-dry zareo fa fieren’ny jiolahy sy ny mpanjono an-tsokosoko ary ireo mpifoka rongony. Fieren’ireo mpangalatra ihany koa hoy ny mponina eo akaiky eo.

Toa sarintsarim-piarovana ho an’ilay faritra ihany raha ilay tamboho natsangana manamorona ny arabe mankany Ankadindratombo iny. Raha tena miditra ao anatiny mantsy ianao dia hahita fa feno lala-masaka ao, izay efa ela nivezivezena tokoa. Mifampitohy sy mifandray avokoa izy ireny ary mivoaka mankany amin’ny lalam-by ery akaikin’ny lagara fiantsonan’ny fiarandalam-by ho any, na avy any Toamasina.

Saiky hangalatra fitia fa tsy nety ny androany e! Ramatoa nialoha lalana ka rehefa nifanena taminay (mpaka kitay) dia nitsiky sisa azo natao. Rangahy indray nitsirika ery ankavian'ny tamboho akaikin'ny lalamby ka tsy sahy nanaraka intsony. Amin'ny manaraka indray eeee!

Raha mihaino ny feon’ireo mponina eo akaiky eo indray, izay nilaza fa nahita ny fiandohan’ny afo sy nampandre ny tompon’andraikitra, dia avy amin’ilay fako nodorana ka nasavoritaky ny tadio no niavian’ny firehetàna. Tokony ho mba nisy ny fanaraha-maso ny afo natsangana araka ny fanamarihan’ireto mponina ireto, satria nambaran-dry zareo ihany koa fa indraindray maharitra iray andro mahery ny firehetana amin’ireo fako sy antontan-taratasy dorana eo ireo. Toy ny afon’ampombo misoko mangina.

Iverenana ilay sarintsarina fiarovana ilay faritra: sarintsariny amiko satria raha ny zavatra hafa tsikaritra tao dia vitan’ny olona ny mikapa hazo ao anatin’io faritra io, raha tsy ny tompony no nàka.

Dia hazo be no teto. Iza no nikàpa, tsy nisy nahita ve?

ny maka tanimena ao,

Ary sao mba ny mponin'ny citè ihany kosa no naka tanimena tety hananganana trano e? Asa lahy!

ny manao azy ho ‘trano fandriam-bahiny vonjy maika’, ny mametraka tsy amin-tahotra ny lakana fanjonoany eo amoron-drano eo,

tsy afenina intsony ny lakana fa avela ery amoron'ny lalam-by

tsy afenina intsony ny lakana fa avela ery amoron'ny lalam-by

ao ny mamadika azy ho trano fivoahana sy toerana fanariana fako na fanariana fatin’olona mihitsy aza ka indraindray dia efa mihintsa-nofo vao misy mahita (indrindra fa rehefa fahavaratra) hoy ny mponina eny. Na dia raisintsika hoe voafefy aza ilay mivoaka any amin’ny lagara, dia tsy olana ho an’izay te-hiditra ao ny miakatra ny tamboho avy aty amin’ny arabe ka miditra mankao. Nitaraina mihitsy aza ireto mponina eo akaikin’ilay faritra fa misy jiolahy tonga mifoka rongony ao anatin’io toerana io, ary amin’ny alina dia tafakatra hatrany ambony tafontranon-dry zareo. Nisy fotoana aza, amin’ny 11 ora alina, dia efa voasokatr’ireto jiolahy ireto mihitsy ny varavaran-kely tany ambony rihana.

Momba ilay hoe maka tanimena ao ny sasany dia tena zava-doza no hitranga atsy ho atsy satria feno lava-davaka be tokoa ao anatiny ao – lalina – ary ny iray amin’ireny dia ao ambany tamboho izay inoako fa efa tonga any ambanin’ny sisin-dàlana aloha kelin’ny tetezana mankany Ankadindratombo. Izany hoe dia efa miomàna izany fa atsy ho atsy mety hianjera ilay tamboho,ary hisy amin’ny ampahan-dalana , na farafaharatsiny sy sisin-dalana (trottoir) hanaraka azy.

Ny arabe mankany Ankadindratombo no ao ambadik’io tamboho io nakàna tanimena io

Nolazain’ny mpiasa iray ihany koa fa raha ny nanomanana ity faritra ity tany amboalohany dia ny ho fametrahana fitaovan’ny direksiona DLA ao amin’ny JIRAMA. Porofon’izany ny nahitàna andrin-jiro vitsivitsy mitsidrahaka ao anatiny ao. Ahitana vavahady roa ilay toerana, ilay ety ambony nidiran’ilay fiara nitondra antontan-taratasy hodorana, dia tariby monja no mba hidiny, raha mihidy cadenas tsy nahitàna fanalahidy hamohàna azy kosa ilay faharoa ery ambanimbany.

Saiky hatao fametrahana kojakoja no nanomanana ny toerana tany ampiandohana

Tokony ho tamin’ny 5 ora hariva latsaka kely tany ho any dia niala teo an-toerana ireo mpamono afo. Teny an-dalana hody koa anefa ny tena no nahatsikaritra avy eny amin’ny toerana avo fa mbola misy afo niha-nahazo vàhana indray avy ery amin’ny morony ambany akaikin’ny farihy. Niverenana nantsoina indray ireo mpamono afo (efa tany Besarety ry zareo tamin’ny antsoko voalohany). Indroa niantso aho ka nielanelana teo amin’ny 5 mn teo izany. Fotoana vitsy taorian’ny niantsoana azy ireo ( 15 mn) dia tafaverina ireo fiarabe roa nantsoina. Ny afo amin’io efa mahavitra  2 na 3  metatra indraindray, rehefa sendra mitsoka be ny rivotra. Marihana fa avy nandalo ririnina isika ary be ny ravina maina nihintsna nameno ilay faritra. Nanamora ny fitaran’ny afo izany, nampian’ireo fako sy ‘sachet’ maro arian’ny sasany ao anatin’ilay faritra.

Olana iray teny an-toerana koa ny tsy fisian’ny atao hoe ‘bouche d’incendie’. Voatery noho izany ireo fiarabe nandeha tany Ambanidia tamin’ny voalohany, ary avy eo vao teny amin’ny tohodranon’ny JIRAMA tamin’ny fanindroany no naka rano.

Tsy nisy olon’ny fokontany nanatrika ny fahatongavan’ireo mpamono afo tamin’ny voalohany, ary tamin’ny famonoana afo faharoa aza dia nantsoina tany mihitsy ny lehiben’ny fokontany sy ny mpiara-miasa aminy vao mba nidina nijery ny zava-nitranga: Tsy takona nafenina anefa ny fisian’ny setroka sy ny anjomaran’ny fiarabe mpamono afo.

Tamin’ny 5 ora sy sasany hariva aho vao afaka tanteraka teny amin’ny faritra nisy ity fahamaizana ity, ary ny zavatra tena nanamarika ahy indrindra dia ny tsy nahitako tompon’andraikitra ambony avy ao amin’ny orinasa JIRAMA – na iray aza – tonga nanotrona sy nijery na nanadihady ny zava-misy. Teny anelanelany teny dia nisy ihany ny antso an-telefaonina nifanaovan’ny mpiasa iray tamin’ny ‘hoe lehibeny’ izay nangataka ny hifampiresaka amin’ny solontenan’ny mponina mipetraka eo akaikin’ilay faritra may, nefa tsy fantatro hoe inona no antony fa dia isak’izay mandray ny finday ireto mponina teo amin’ny faritra dia tsy misy namaly resaka any ambadika any, fa nangina na tapaka ny fifandraisana. Tsy nisy araka izany fifampiresahana teo amin’ilay ‘lehibe any anaty finday’ sy ny olona ‘saiky tra-boina’ teny an-toerana. Mahagaga an!  mahatalanjona!  Tsy zava-maivana velively anefa ny tohiny raha sanatrian’izany ilay firehetana faharoa ka tsy tsikaritra ara-potoana satria mety ho niredareda nandritry ny alina tao sy nandoro ireo ‘citè’ teo akaiky. Ireto farany rahateo efa nisy nipitihan’ny afo, ka raha ny filazan’ilay vavolombelona mitantara eto ambany dia nisy tamin’ny zanany mihitsy no may teo amin’ny tratrany. Soa fa tsy dia zava-doza loatra,. Fa na izany aza…

Talohan’ny nialan’ireo mpamono afo tamin’ny andiam-pamonoana voalohany dia nanafatra ireo mpiasa izy ireo (teo imasoko no nanaovany an’izay) mba hanara-maso ilay afo sy ny faritra manodidina. Ary tamin’ny fiverenany faharoa dia tezitra mafy izy ireo fa hoe tsy nandray ny andraikiny ireo mpiasa nafarana. Ireto farany izay nanamarika raha nanontaniako fa

avy any Atsimon’Ambohipo no naharay ny antso ka nidodododo namonjy an’i Mandroseza ny iray, ary ny iray hafa kosa avy any Avaratr’i Mahazoarivo.

Fomba ahoana hoy izy ireo no hanarahanay maso ny afo avy any ambadiky ny akata be any, ary izahay rahateo olona tsy amperin’asa fa mba tonga fotsiny nanohana ny antso sy manampy amin’izay tokony ho vita. Ny tokantranonay koa ve tsy kaontiana?

Isan’ny kiana nataon’ireto mpamono afo tamin’ireo mpiasa ny hoe

efa mba nilazana ianareo fa mba jereo ilay afo, nefa moa nareo aza mamo amperin’asa. Tsy eritreretinareo ny gas oil laninay sns…

Mino aho fa tsy nahafantatra itsy nolazaina tetsy ambony ireo mpamono afo hoe mpiasa tsy amperin’asa anie ary tany ampiatrehana ny fiainany manokana tany ireto manatrika azy eo amin’ity toerana ity.

Nisy olona sendra naheno izay ‘taim-bava’ avy amin’ny mpamono afo izay no tsy faly ka nimonomonona niteny hoe

Tsy ny asan’ialahy no atao tsara fa ialahy tsy namono tsara ny afo tokony hovonoin’ialahy no nahatonga an’io niverina. Ary ny hetra alohanay no miantoka ny gas oil fa tsy avy any ampaosin’ialahy. Ka vonoy ny afo dia mandehana mody

Soa fa tsy henon’iretsy avy any Tsaralalana ny teniny fa asa angamba izay ho tohiny. Mety tsy ny afo indray no voatondraka.

Mbola teo amperin’asa tanteraka ireo mpamono afo tamin’ny 5 ora sy sasany nialana teny an-toerana sy tsy nahitako tompon’andraikitry ny orinasa mba tonga teny an-toerana. Mampalahelo! Tena olom-pirenena tompon’andraikitra tokoa k’ah….! Hoy sisa  ilay iraikalahy nisotro kafe tetsy ampita hoe

izao no izy rehefa tany tsy misy fanjakana.

Fanjakana iza anefa ilay andrasana? Foibe sa fanjakan’ny JIRAMA ? Tsy fantatro ! F’angaha tokoa moa misy idiran’ny fanjakana ny fitiavana milalao afo? Ny andraikitry ny orinasa amin’ny tokony hiarovany ny fananany angamba no tokony hasiana resaka

Antenaina  fa mba efa maty tanteraka izay ny afo any an-toerana ary mba handry fahalemana ny olona.

Fa isan’ny tsy hita teny koa ny mpanao gazety matihanina!

Ato  ny video misy ny fijoroana vavolombelona nataona mponina iray monina tena eo akaikin’ity faritra nirehitra ity. Ao anatin’izay fijoroana vavolombelona izay no ilazany fa ny afo nandorana ny fakon’ny JIRAMA ihany no nandoro koa ny kirihitra manodidina ary nanampy tosika sisa ny rivotra. Afo izay raha nisy kely foana dia namoizan’ireto olona ireto ny fananana hàriny an-taona maro.