Fandalinako Ny Fifidianana 31 Jolay 2015 #mdg2015 #communales #tnrRV

Tsy ho asiako sasinteny betsaka ity fa ny resaka ato anatiny aza efa ho lava rahateo. Vita iny fifidianana fa inona no azoko lazaina momba azy iny?

DSC_0262

FIDONGIANA
DSC_0257Antony maro no manosika ny olona tsy handray anjara. Na inona anefa na inona no antony tsy nandehanan’ny maro nandatsaka vatom-pifidianana, dia hafatra sahady izany ho an’ireo mpirotsaka hoe misy zavatra tsy lanin’ny vavonin’ny ‘maro’ ao. Araka izany dia tsy afaka ny hiteny koa izay lany fa hoe lanin’ny maro an’isa amin’ny vahoaka. Ekena fa lanin’ny maroan’isa tamin’izay tonga nandatsa-bato, fa tokony ho fantatra ihany koa hoe firy isan-jaton’ilay vahoaka maro an’isa no tonga nandatsaka ny safidiny. Sarotra araka izany ny hihevitra fa ho mamim-bahoaka daholo izay fanapahana hivoaka avy amin’ilay olom-boafidy, na dia natao tao anatin’ny faritry ny ara-dalàna aza. Mety hiteny ianao mpamaky hoe “diso ary tsy manan-jo haneho hevitra ireo rehetra tsy tonga tany”. Efa mariky ny fanehoankevitra ho an’ny mpikarakara fifidianana ny tsy nahatongavany, ary fanehoankevitra koa ho an’ireo mpirotsaka- raha ho hain’izy ireo ny maka lesona avy amin’izany, mazava loatra-

Fohy loatra ny fotoana napetraka hamantarana ny mpirotsaka tsirairay, ka tsy te-hihinana am-bolony ny olona. Naleony lavitra tsy nifidy toy izay hihinan-kena tsy fantatra. Tsy ao anatin’io ireo efa nifikitra sy mifikitra amin’izay efa nandrian’ny fony an-taona maro. Tsy dia naharesy lahatra ny olona loatra ny hoe handeha hamonjy birao ka hanao vato fotsy, sao hono mantsy, hisy lalàna miova eny am-pandehanana (toy izay hita tato ho ato) ka sanatria ny vato fotsy alefa hanampy izay nànana ny maro an’isa.

Ho an’ny hafa indray dia ny fieritreretany fa hanao ny fomba rehetra ny tompom-pahefana hampandresena ny azy, ary ho azy ireo dia toy ny efa fantatra mialoha ny ho vokatry ny fifidianana, antony tsy nandehanany nandatsa-bato. Fandaniam-potoana fotsiny, hono, izany. Tsy anomezan-tsiny azy ireny izany, raha ny hita tamin’izay fomba fanao teto amin’ny firenena hatrizay tokoa.

ANDRO ZOMA

Na dia nambara tamin’ny didim-panjakana aza fa andro tsy fiasàna fa andraisana karama ny Zoma 31/07/2015, nanaovana iny fifidianana iny, dia marobe ireo mpiasa amin’ny Zones Franches, Sinoa, sns… no NOTERENA HIASA. Very zo, araka izany, ireny Malagasy toa ahy sy ianao ireny. Tiako ho fantatra ny andraikitra horaisin’ny fitondràna foibe manoloana izany (ataovy fantatry ny rehetra izay fepetra raisinareo, ampahafantatro amin’ny haino aman-jery rehetra mihitsy), satria tsy voalohany izao no nisy fanimbazimbàna sy faniratsiràna didim-panjakana tahaka izany nataon’ireo vahiny miseho azy ho mifehy ny toekarena eto Madagasikara ireo.

OLAN’NY LISITRA

DSC_0269Ny 15 Aprily 2015 no farany nandalo hatao fanintsiana ilay lisi-pifidianana. Ary herinandro nialohan’ny fifidianana indray ny ankamaroany vao voaray teny amin’ny fokontany samihafa. Nisy aza andro vitsy mihitsy. Araka izany dia sarotra ho an’izay tsy tao anaty lisitra ny hahita hoe voaverina soa aman-tsara tao anaty lisitra ny anarany izay efa nitondràny fanitsana tamin’io Aprily io.
Nisy dia nisy tokoa ny nanao fanitsiana, saingy rehefa tonga ny androm-pifidianana, dia nitonantonana teny amin’ny birao fotsiny niaraka tamin’ity karapanondro sy kara-pifidianana teny an-tànany, fa hay voaendaka tao anaty lisitra indray ny anarany. Ary ny nahagaga ny sasany aza dia ny fianakaviany efa maty sy tsy tao anaty lisitra intsony tamin’ny 2013 no mbola nisoratra tao indray. Tsy lazaina intsony ireo ‘maro an-davaka’ nefa zara raha nisy iray na roa tafiditra tanaty lisitra. Ny an’ny hafa indray, rangahy vadiny efa maty am-bolana marobe no ao anaty lisitra fa i ramatoa mbola velona mirijarja soa aman-tsara, very zo.
Asa na mba noheverin’ireo nisahana iny lisitra iny ny fahasahiranan’ny olona nàka fahazoan-dàlana hanamarina ny anarany tany amin’ny fokontany – ho an’izay afaka nanao izany – sy ny tsy fahazotoan’ny olona hivezivezy lava handany fotoana hanamarina fanindroa, fanintelo sns… ny lisitra, izay raha ny tena marina dia tokony ho efa asa tsy azon’ny fokontany ialàna no sady tsy tokony hisy diso rahateo.
Teto anefa dia tsy an’ny fokontany ny hadisoana satria tsy olony no nanao ny fanisàna sy ny fanaovana ilay lisitra hatramin’ny farany. Olon’ny CENI-T no nanatateraka izany, ary dia betsaka tokoa no very zo. Na ny seketeran’ny fokontaninay aza, tao anaty lisitra tamin’ny voalohany, fa nony tonga ny fifidianana, tsy tao intsony ny anarany. Nihanahana fotsiny teo ambony dabilio ilay ramatoa, izay sady tokony ho mpifidy manana zo, no mpiandraikitra ny fanamarinana ny anaran’ireo olom-pirenena tonga hifidy nilahatra teo anoloany.
Fampielezampeo iray no nandrenesako ity (tsy tsaroako intsony hoe iza, fa raha misy afaka manamarina dia isaorana indrindra): Rehefa ampitahaina ny tomban’isan’ny mpifidy faran’ny volana oktobra 2013, tomban’isa azo avy tamin’ny projection-n’ny isan’ny mponina Instat -…, araka ny tomban’isa nomen’ny Ceni Madagascar, dia hita fa misy mpifidy tombanana hoe eo amin’ny 1 233 510 eo ho eo tsy tafiditra ao anaty lisi-pifidianana (tiako raha misy afaka manamarina ny vainm-potoana lazaina sy ny tarehimarika ao anatin’io zava-boasoratra io). Mampalahelo.

TSY MATOKY :

Mariky ny tsy hafalian'ireo nahazo kara-pifidianana saingy tsy hita tao anaty lisitra tamin'ny ora farany

Mariky ny tsy hafalian’ireo nahazo kara-pifidianana saingy tsy hita tao anaty lisitra tamin’ny ora farany

Tsy omen’ny olona fitokisana loatra intsony ny voka-pifidianana avoakan’ny andrim-panjakana natao hisahana izany. Raha vao resaka fifidianana mihitsy no resahana. Leo ampiesonina amin’ny resaka fampisehoana sy fizaràna zavatra izy, nefa rehefa mandeha ny taona mifandimby, tsy mahita fampanantenana tanteraka antsakany sy an-davany. Nilaza ny hahavita betsaka sy tsara kokoa noho ny teo aloha, nefa aotra no vokatra hita nony tonga eo amin’ny toerana. Sanatria toy ilay ‘mamo nanome toky’, ka nony nisava ny hamamoana, dia toy ny tsy niteny na inona na inona ilay nitokiana. Angamba ve efa manomboka mifoha ny mponina eto Antananarivo? Mety ho diso izay fihevitro izay, satria matoa mbola manao ireny fomba ireny ireo mpifaninana tamin’ity fifidianana Ben’ny Tanàna ity, dia fantatr’izy ireo fa mety mbola hisy hirika hampandaitra azy io. Diso anefa ny kajy ho an’ny sasany.
Any andro, any taona, rehefa tena mifoha tokoa, ka tena tonga saina amin’ny atao hoe politika sy afaka mamakafaka lalina ny vahoaka – tsy Antananarivo ihany, fa Madagasikara manontolo –  dia izay vao hisy fiovàna azo andrandraina ho antsika rehetra.

Vahaolana azo raisina angamba : terena ny olona handatsa-bato amin’ny manaraka. Apetraka ny sazy (ara-pitantanana) ho an’ireo izay tsy afaka manamarina ny antony tsy nandehanany nandatsa-bato (miainga eny amin’ny fkt no ampiharana an’izay) satria toa lasa heverin’ny olona ho zavatra tsy dia misy lanjany ity resa-pifidianana ity.
Rehefa jerena amin’ny ankapobeny ireo birao vitsy mba noteteziko tamin’iny andro iny, dia zara raha nahatratra ny 30% ireo olona tonga nanatanteraka ny adidiny isaky ny biraom-pifidianana (Ankadifotsy I- Ankadifotsy II- Behoririka – Andravoahangy I).

VOKA-PIFIDIANANA

DSC_0334Raha tsy misy ‘miracle’ sy zavatra hafa tsy takatry ny saina, dia tsy hiova intsny ny voka-pifidianana ho an’Antananarivo RV. Lany ary tolorana arahaba ny mpirotsaka Lalao RAVALOMANANA.
Tsy aritro anefa ny tsy hiteny ity ahiahiko ity: toa tandindon’ny tantara tamin’ny 1991-1996 nanjo ny AREMA ity fifidianana Ben’ny Tanàna, 31 Jolay 2015, ity. Tamin’izany fotoana rehefa nahilika RATSIRAKA, ka nomena ny hafa ny fitondràna ny firenena, dia nomena vintana fanindroany hanitsiany ny diany izy. Efa fomban’Antananarivo foana koa moa ity mikisaka manakaiky izay henjehina ity. Saingy haintsika ny tohin’ny tantara, fa taona vitsy taty aoriana, naloan’ny vahoaka indray ingahy RATSIRAKA. Ny tiako hahatongavana dia hoe: nisy fotoana nitondra fanjakana ny fianakaviana RAVALOMANANA, nisy ny nety, ary nisy ny tsy nety. Matetika dia ny tsy nety no mibahana indrindra amin’ny fisainana sy fijerin’ny olona ka mahatonga ny fanonganana sns… Fa izay nety dia voasarona àny. Fiainana iainantsika isanandro izany, ary iarahan’ny rehetra mahalala. Amiko dia lany noho ny ‘anarana’ sy ny ‘antoko’ nisalorany izy. Tsy misy maharatsy izany. Saingy raha sanatria ka mibolilalila fitondra eo izy, dia hisy fiantraikany ho an’i Marc RAVALOMANANA amin’ny 2018 izany. Mila mandray lesona avy amin’ny valim-pifidianana rehetra ho voaray manerana an’i Madagasikara araka izany. Tsy ho azy irery anefa io mila maka lesona io, fa hatramin’ny HVM izay noverezin’ny hafa lavitra mihitsy tamin’ny ankapobeny – na dia nisy aza toerana sasany nandreseny –

FIARAHA_MIASA

Katsaho izay ho fiaraha-miasa matotra, na io miaraka amin’ny mpitondra foibe, na ireo izay tsy mitovy hevitra nifaninana tamin’ny tena, ka tsy ho fialantsiny aroso ho an’ny vahoaka indray ny hoe ‘gafy ataon’ny fitondrana, fingampingana nataon’ny mpanohitra’ no tsy nahatanterahana ny tetikasa hanatsarana an’Iarivo. Izaho manokana mantsy aloha, talohan’ny fifidianana teo , dia tsy mbola nandre amin’ny antsipirihany izay tetikasan’ilay mpirotsaka lany ho Ben’ny Tanàna.
Hatrany am-boalohany dia zavatra efa notakiako tamin’ireo mpirotsaka ny hoe ‘iza no sahy hilaza fa hanàla ny mpivarotra amoron-dàlana (enta-madinika sy fiara) sy hanadio ny tanàna amin’ity resaka fako ity…Santionany ihany tamin’izay zavatra notakiako ireo. Ity resaka fako ity, mety ho mora ihany ny hamaha ny olana, fa ilay fanesorana ny mpivarotra amoron-dàlana no tena mba ho arahako akaiky ny fanatanterahana azy, satria dia sady manimba endrika ny tanàna no manelingelina ny mpiaramonina, amin’ny faritra rehetra misy azy ireny. Tsy hafa amin’izay koa ny resaka fiantsonan’ny fiara.
Hiaraka hiasa izany izao na ny lohalaharana na ny mpifaninana taminy. Aoka ny mpandresy tsy hihanjona ka hanambòny tena sy hilanja loha fa hoe azy izao ny tanàna, ka tsy mila mandray ny hevitry ny hafa, ary aoka koa ny resy mba hahay ‘hipetraka’ ary haneho fahavononana hiaraka hanatsara ny fiainam-bahoaka ao anaty hitsim-po madio. Avelao any izay fifanaratsiana teny an-kianjan’ady teny, fa ady hafa izao no mila iarahanareo roa tonta miatrika. Ny iray hitoetra ho ray aman-dreny lehibe, ny ankilany haka ny toeran’ny zanaka hendry, ka tsy hanara-poana koa anefa, no sady koa tsy hanao bontolo amin’ny fomba fanitsiana tokony hatao. Ny kiana dia kiana tokony ho fanatsaràna, ary ny kianina tokony hahay mijery sy mandray izay kiana hita fa mety sy mitombina. Tsy hitondra antsika ho aiza ny fifanolanana sy fifanenjehana lava eto. Ary aoka tsy hisy ny fitondràna mitanila araka izay ho hitantsika sy hohenoina etsy ambany. Ampitovio ny fitondra ireo boriborintany rehetra, na nahazoana vato betsaka, na tsia, satria ho azy ireny no nahalany anao, fa tsy ho an’olom-bitsy nifidy anao ihany. Sao dia ho sary hafa no ho hitan’ny vahoaka rehefa amperinasa ianareo: sanatria tsy hisento ny vahoaka hoe ‘hay toerana fotsiny no notadiavin’ireto!’. Ampiharo mandrakariva ny mangarahara amin’ny endri-pitantanana rehetra.
Raha ilainareo roa tonta hiaraka ao aza ny mampiasa jadona (iraisana) mba ho entina manarina ny gaboraraka eto amin’ny tanàna, dia ampiharo rehefa hita fa hahasoa ny vahoaka. Katsaho izay fomba hampiraisanareo ny vahoaka nanaraka tao an-damosinareo, fa raha mbola ianareo lohany no matsatso sy variana hifampihantsy lava eo, dia tsy ho gaga isika raha hifampihantsy sy hifanompa lava koa no hataon’ny mponin’Antananarivo. Atsaharo ny fizahozahana sy ny fidedahana ho ‘favori’ na manam-pahaizana. Sy hampandroso antsika izany. Fa ny maha-favori ny andaniny + ny maha-manampahaizana ny ankilany no ento hampandroso.

AHIAHY TSY IHAVANANA

Ahiahin’ny sasany amin’ireo tsy mpomba ny Ben’ny Tanàna vao lany – mbola tsy ofisialy hatreto – ny hoe ‘sao lahy ka rehefa tonga eo amin’ny fitantanana, dia ny hanonitra ny fahavoazana nanjo ny orinasam-pianakaviana no ho hazakazaka voalohany hatao!’ Manantena anefa aho fa ho olon-kendry izany hitantana tanàna izany, ka tsy sanatria hanatanteraka tokoa ny teny nolazainy nandritry ny alin’ny nahafantarany tamin’ny fomba tsy ofisialy fa azony ny fandresena. Ilay mibolisatra kely tahaka ireny mantsy, mety kely tokoa amin’ny hafa, fa zava-dehibe tokoa ho an’ny hafa mandinika akaiky ny raharaha.

FANAMBARANA TAORIAN’NY FANDRESENA

Maro ireo milaza hoe vaovao tsy marina hono ilay fanehoan-kevitra nataon’ny ben’ny tanana vaovao omaly. Averiko eto ilay Declaration an’i Ben’ny Tanana Lalao Ravalomanana, araka izay nilazany azy. » ……………arakakaraky ny pourcentage azoko eny amin’ny arrondissement no hanaovako ny asa……………….. »

by Noaheninkaja Vonin’Aina Herimonina Rakotomanantsoa on samedi 1 août 2015 – Facebook

AN’IZA NY TSINY

Ny lisitra ary ve izany no homena tsiny, sa ny safidy tsy handeha hifidy ka nahatonga ny taham-pandraisana anjara ho ambany be ? Betsaka no nanakiana mivantana sy tsy niolankolaka ny CENI-T tamin’ireo tsy fahatomombanana maro tsikaritra nandritra iny androm-pifidianana iny.
Ny fokontany no tokony nampiandraiketina ny fanisàna sy fandrafetana ny lisi-pifidianana (dingana voalohany), vao miditra aty aoriana ny anjaran’ny CENI-T araka izay tandrify azy rehefa avy natao ny fanamarinana rehetra. Ahoana moa no mba aneken’ny saina ny hoe ‘nahazo kara-pifidianana ianao’ dia nony tonga hifidy dia hoe ‘tsy ato anaty lisitra ny anaranao Madama’
Tsiny hafa koa ny tsy fisian’ny vata fandraisampeo tany anaty birao sasany, ka tsy nahenoan’izy ireo ny toromarika. Noho izany dia isan’ny fanapahana iray niteraka olana be ny fampitàna avy amin’ny CENI-T izay miovaova eny am-panidinana eny, toy ny hoe azo ampidirina atao ‘AJOUT’ ny anaran’ny tsy ao anaty lisitra (ary dia nisy nanatanteraka tokoa), nefa aty aoriana indray dia nofoanana. Dia ahoana? Maty ve izany ilay lisitra sy ny birao nisian’izay? Toa kilalaon-jaza izy ity an!

HO AN’NY TSIRAIRAY

Aza adino fa ny Ben’ny Tanàna dia Ben’ny Tanàna ihany. Manana izay programany izy, fa ianao vahoaka tsy mandady harona io, raiso koa ny anjara tandrify anao. Marina fa tsy hampiditra vola any am-paosinao ny olona lany eo, fa ny hàka aza no hataony (tsy fanenjehana io fa sao any indray no haneho hevitra ny fanatika an). Ilainy ianao handoa ara-dalàna ny hetra mba hanatanterahana ny asa, dia aloavy raha fantatrao fa izay no izy. Misy foto-drafitrasa efa mipetraka eny rehetra eny, tsarovy fa io hetra lazaiko io no nanaovana azy ireny. Izany hoe vola tany ampaosinao ihany. Tompony ianao araka izany, ka fadio manomboka izao ny toetsaina tia manimba izay mba tsara vitan’ny teo aloha. Ny mampitombo izany amin’ny alàlan’ny tsara avy amin’ny tsirairay no ilofosy. Iza no hizaka ny fahavoazana aterany? Isika tsirairay ihany. Indrindra fa ny taranaka ho avy

HADALANA HITA SY RE

Re avy any Ambohimanga –Fokontany Soavinimerina fa nisy kandidà mandeha amin’ny anaran’ny tenany nitondra olona tsy anaty lisitra mba hifidy, saiky hanararaotra ilay hoe afaka manao ‘Ajout’ voalaza tery ambony

VAZIVAZY SISA

Rehefa tsy tao anaty lisitra ny olona sasany dia naleony sisa nanara-maso ny zava-nitranga,  no sady nivazivazy ihany hoe: aleo miandriandry kely fa sao mba tafiditra anaty 2ème liste après délibération e!
Hoy indray ny sasany nanao vava tsy ambina hoe: Dia vitao ao ny anareo fa na ho inona na ho inona koa anie, tsangan’olona ny anareo no fidiana fa tsy tsangan’asa e

FEHINY

Raha 30% toy io hitako io no tena taham-pahavitrihana ho avoakan’ny CENI-T tamin’iny fifidianana iny, aoka tsy hihevitra ho lanim-bahoaka izay lany. Fa fotsiny lanin’ny maro an’isa tonga nifidy. Misy maha-samihafa azy izany satria ny ‘mpibodo fifidianana’ no betsaka tsy nandeha nifidy, ary efa manana ny mpifidy raiki-po aminy tsy miova ny TIM, izay mazava loatra fa tsy hamela irery ny mpirotsaka tohanany.
Tokony hahatsapa ny CENI-T fa kitoatoa sy tsy tombombana iny fifidianana iny.
Ho anareo HVM: afaka hakànareo lesona ny zavatra niseho rehetra sy ny vokatra nanerana ny Nosy. Manana notoriété ve sa tsia ? sns… Ohatra fotsiny ny tao Sabotsy Namehana sy SAMBAVA
Ny MAPAR, mety hihevitra ianareo fa duel entre TIM sy MAPAR no tena niseho, tsy olana izany, ary toa marina,  saingy raha mbola te-haka ny fon’ny olona, ovay ny famindra.
Ho anareo tsy tao anaty lisitra teo. Aza adino ny manamarina akaiky ny momba anareo any amin’ny fokontany manomboka izao, fa tsy rehefa tonga indray ny amin’ny manaraka vao hikamenona eto isika mianakavy
Ho anareo zatra tambatambazana amin’ny fety sy vola tsy mahavita firy andro akory, mandiniha amin’ny manaraka, fa ny vola tsy hangidy rahoviana.

DSC_0331Fanehoankevitra mifandraika amin’ny lahatsoratra: ato ny an’ny WYLD sy ny Liberty32

Fifidianana #mdg2015 #maire #communales #tnrRV

Androm-pifidianana androany 31/07/2015. Tamin’ny 5: 45mn aho no efa teny an-toerana raha amin’ny 6 ora maraina no voatondro hivoha ny birao fandatsaham-bato. Talohan’izany kosa anefa dia efa samy hita teny an-toerana ireo mpiandrakitra teto amin’ny fokontany misy ahy. Tanaty fahavononana tanteraka. Ny solontenan’ireo mpirotsaka indray aza no teo tara fotoana, satria dia iray ihany no tonga tamin’ny fotoana ara-dalàna.

Raha ny tetsy amin’ny EPP Ankadifotsy I misy anay dia biraom-pifidianana mifanao ambony ambany no ao. Navitrika kokoa ireo mpifidy tao ambany raha oharina amin’ireo tokony handrotsaka tao ambony rihana.
Rehefa tonga ny ora voatondro, dia naseho ho hitanay mpifidy efa nanatrika teo, sy ny solontenan’ny mpirotsaka ireo fitaovam-pifidianana, izay samy tsy mbola nisy nesorina tao anatin’ny fonosany avy. Toy izany koa ny boky misy ireo takelaka hifidianana sy ny vata mangarahara izay natongilana mihitsy hahitàna fa tsy misy na inona na inona tao anatiny. Avy eo nakatona teoimason’ny rehetra izany ny vata. Nizotra tanaty filaminana izany rehetra izany tamin’ity maraina ity.
Foibem-pifidianana 4 no noteteziko androany maraina (Ankadifotsy I, Ankadifotsy II, Behoririka akaikin’ny Galana, EPP Andravoahangy I). Be olona nazoto nifoha maraina kokoa ny tao Ankadifotsy II sy Andravoahangy I. Samy tsy nahitàko olana aloha hatreto.

Mangingina koa ny eny an-dàlana no sady malalaka ny arabe. Irariana mba hitohy izay filaminana izay mandritra ity anio ity.

Entanina koa anefa isika rehetra mba hanaraka akaiky izay zava-miseho eny amin’ny misy antsika tsrairay avy eny, mba hialàna amin’ny fisian’ny hosoka, na faneriterena ny olona amin’ny safidiny. Ampahafantaro ny be sy ny maro fa azy ny safidiny, ary malalaka izy haneho izany. Aoka tsy hivarotra ny hoavinao sy ny taranakao amin’ny vola tsy mahavita andro iray akory, nefa avy eo hitondràna ny mafy mandritry ny taona maro.
Tandremo koa fa tsy azon’ny mpikambana ao amin’ny biraom-pifidianana atao velivelyny misava ny mpifidy. Manao fanamarihana no ataony raha misy mampiahiahy (avy amin’ny CENI-T)

Filohan'ny birao manamarina ny karatry ny delege

Filohan’ny birao manamarina ny karatry ny delege

ireo fitaovana mbola tsara fono

ireo fitaovana mbola tsara fono

ilay biletà amin'ny endriny carnet eo amin'ny souche no misy laharana, fa ilay takelaka kosa no tsy misy laharana ahafantarana azy. Tsiny goavana io amiko

ilay biletà amin’ny endriny carnet
eo amin’ny souche no misy laharana, fa ilay takelaka kosa no tsy misy laharana ahafantarana azy. Tsiny goavana io amiko

ilay bokikely misy ny toromariky ny CENI-T

ilay bokikely misy ny toromariky ny CENI-T

olona milahatra vao maraina be mba hanefa ny adidiny (Ankadifotsy I)

olona milahatra vao maraina be mba hanefa ny adidiny (Ankadifotsy I)

DSC_0227

filohan'ny biraom-pifidianana mampiseho amin'ireo mpifidy fa vata tsy misy na inona na inona no nampiasaina (Ankadifotsy I - Birao 2 ambony rihana)

filohan’ny biraom-pifidianana mampiseho amin’ireo mpifidy fa vata tsy misy na inona na inona no nampiasaina (Ankadifotsy I – Birao 2 ambony rihana)

fanakatonana ny vata fandatsaham-bato

fanakatonana ny vata fandatsaham-bato

fanakatonana ny vata fandatsaham-bato

fanakatonana ny vata fandatsaham-bato

Ny mpifidy voalohany tao amin'ny birao fandatsaham-bato

Ny mpifidy voalohany tao amin’ny birao fandatsaham-bato

Mpifidy ao Ankadifotsy II, akaikin'ny ISCAM

Mpifidy ao Ankadifotsy II, akaikin’ny ISCAM

Mpifidy EPP Andravoahangy I

Mpifidy EPP Andravoahangy I

Fanamarihana:

Tsimbazaza: 8:32 tonga handatsabato ao amin’ny CEG Tsimbazaza, Birao faha-2 Salle Normandie Atoa Hery Rajaonarimampianina
Tsy dia nandre fampielezampeo tany anaty biraom-pifidiannaa aho androany. Asa rehefa avy eo angamba!
Bezaha: Nifamadika ny vatam-pifidianana dia tara 45 mn ny fandatsaham-bato tany (loharano: RNM)
Manakara : tara ny lisitra avy amin’ny CENI-T ka tamin’ny 8:20 mn vao nanomboka ny fifidianana tao amin’ny kaominina ambony vohitra

VEHIVAVY LEHIBE MPANDREBIREBY

Efa tantara nisy tany aloha izy ity. Misy tamintsika no efa nandre, na niharany teny amin’iny faritra « petite vitesse » iny. Nangingiana teo aloha teo, saingy niverina kosa tato ho ato araka ity tatitra iray voaray ity. Ny hevi-dehiben’ny tatitra voaray no ezahana hivoaka (afa-tsy ny anaran’olona voatanisa tao anatiny).  Tany aloha dia lehilahy iray mampanao zavatra atao ambany lela izany no nalaza ho nanao azy, ary ankehitriny indray dia efa vehivavy lehibe tsy ampoizinao no manatanteraka fampiesonana eny an-dàlana eny. Tsy dia ataoko hoe ‘fisolokiana’ loatra no azo amaritana ny ataony, fa dia fandraikiraikena angamba no akaiky kokoa.

Tandremo àry! Araho ny tatitra iray avy amin’ny tsara sitrapo:

 

Tranga voalohany:
Femme de ménage tao aminà toeram-piasana iray no tratra t@ izy ity ka tena nitomany tena saika tapaka lalan-drà mihitsy, efa marary fo rahateo ilay ramatoa! Orinasa vitsivitsy no hanaovany ny asa fanadiovana isan’andro, noho izany raha atambatra ny vola totalin’ny karamany isam-bolana @ ireo orinasa ireo dia eo @ 100.000 Ar/volana eo.
T@ faran’ny volana teo ary dia andro iray no nandraisany ireo ambim-bola karamany rehetra avy tao @ireo orinasa samihafa niasany ireo (Alatsinainy 30 Jona teo io andro io, efa nisy nanome « avance » ireo orinasa sasany talohan’ny fety 26 Jona ka mitontaly eo @ 50.000 Ar sisa no tontalim-bola noraisiny io faran’ny volana Jona io). Nony efa vita daholo ny asany t@ ireo orinasa iasàny ireo, ary voarainy daholo koa ny ambim-bola karamany rehetra dia mba niantsena kely tao Analakely ny anao vavy fa hoe nisy patalohan-janany mba tiany ho vidina tao! Dia voavidy ilay pataloha ka nihazo ny làlana hody (fahazàrany ny mandeha an-tongotra mandeha mody any Ankorondrano isan’andro rehefa avy miasa). Rehefa nandalo teo @ arcade misy ny magazay Bao Laï iny izy no nisy vehivavy lehibe iray niantso azy moramora avy ao aoriana ka toy izao manaraka izao no niseho :
Nisy vehivavy lehibe, efa “ramatoa », hoy izy, no nanaraka sy niantso azy moramora avy ao aoriana niteny hoe “ô ry Madama a, mailomailo ianao fa misy bandy roalahy rery manaraka aoriana rery efa tsikaritro nitilitily anao efa ela fa mpanendaka angamba ireo, te hanendaka anao » dia ampiany hoe « aza miherika mihitsy ianao aloha », sady @ io ilay ramatoa efa mitankosina aminy miara-dalana aminy dia tena miresaka mandresy lahatra tsara azy! Dia manohy ny resany ihany izy hoe « mijanona mihitsy ianao aloha dia esory sy avohay daholo izay zava-tsarobidy eny aminao dia ampirimo fa ho endahin’ireo bandy ireo ianao raha tsy mahay! » Ilay femme de ménage koa kelikely sady katahotahotra kely izay ka tonga hono dia nivarahontsana avy hatrany naheno an’izay, Dia nijanona tokoa, ilay ramatoa koa mijanona niaraka taminy sady nanao hoe “aleo ampiko ianao fa mampalahelo ahy raha sanatria voan’ireo bandy ireo! » Dia nesorin’ilay ramatoa, hono, ny peratra volamena alliance teny @ ilay femme de ménage, nataony anaty sachet kely efa teny an-tanany, ilay femme de ménage @ io rano an-dravina mangovitra matahotra, dia nanampy indray ity ramatoa ratsy toetra nanao hoe « raha misy vola koa anaty poketranao any dia esory ovay toerana fa izay angamba no tena tilin’ireo bandy ireo any aminao miaraka @ ity peratra ity! » Dia asa izay nahazo ilay tra-doza fa toy ny hoe voan’ny fandraikiraikena marina angaha fa dia nanaiky, namoaka ny vola rehetra avy any @ poketra teo imason’ilay ramatoa, dia io @ izany mody manampy, « ataontsika ato @ ity sachet kely ity miaraka ao daholo ny peratra sy vola dia jereo fa ato no asiko azy an!! » Dia hitan’ilay ramatoa izao, hono, ilay peratra sy ireo volany rehetra nataony anaty sachet kely dia nasitriny t@ ilay harona nisy ilay pataloha vao avy novidina! « Ao daholo ilay izy dia mandehana @izay mandeha mody haingana »  hoy izy « fa tsy mahita n’inon’inona any @ poketranaoany ireo raha ilay poketra no tetehiny fa efa niova toerana ny volanao sy ny peratrao!Izay fa veloma dia mitandrema tsara @ sisa!!! » Dia nisara-dalana zareo!Ilay femme de ménage @ io mbola nisaotsaotra azy no sady rano an-dravina ihany, ka tsy nanohy ny làlana nody aloha fa lasa namonjy niditra tao @ ilay birao iray fiasàny ao Analakely mba haka souffle kely fa natahotra mafy no sady mba hoe hipetrapetraka hanamboatra entana tao aloha! Kanjo inona no niseho?? Tonga tao @ ilay birao dia nosavaina ny harona nisy ilay pataloha fa hoe hijery ilay peratra sy ireo vola mba hamboarina tsara ny toerany,  tsy nisy n’inon’inona afa tsy ilay pataloha sisa tao, ilay sachet kely nivoromborona tsy nisy n’inon’inona no indro hita tao niaraka t@ ilay pataloha! Dia nitomany tena nifamonjen’ny tao @ birao ilay ramatoa, fa lasa daholo ny ambin-karama rehetra vao noraisina, niaraka t@ peratra mariazy volamena! Tena loza ilay mpampiesona!!

Izao izany no tena fandehany :
Mety efa narahany ela sy voadinidinika ela ny momba ilay olona hoasiany, mety misy namany vitsivitsy miaraka aminy manao izay asa izay, efa nitily elaela anao izy hoe misy peratra na firavaka sarobidy eny aminao, na koa mety hitany ianao hoe avy nandray na nikirakira volabe tany ho any, nividy zavatra ohatra ka namoaka vola, dia narahany ka rehefa hitany hoe olona mety mareforefo mora fitahina na mora resena lahatra ny toetoetranao dia avy @izay izy manantona anao manao ity fomba ratsy ity !
Koa mailomailo rehefa mandeha eny an-dalanà, aza mety rebireben’olona loatra fa tena misy mahay mandresy lahatra @ zavatra tsy ampozinao! Fihino tsara ny poketra na ny kitapo ary aza varimbariana loatra, indrindra rehefa mividy zavatra ka mamoaka vola, na koa rehefa mi téléphone eny an-dalana eny, fa mety tsy ampoizinao fa mety misy manara-maso ianao @ zavatra sarobidy misy eny an-koditrao sy eny aminao : vola, firavaka, téléphone, malette misy ordi portable sns…Aoka ho mailo foana e!!!

Tranga faha-2 :
Vao avy notantarain’i D…  ahy izao maraina izao fa cas mitovy tsisy valaka @ io no nahazo ilay rangahy mpampianatra vao maty t@ herinandro teo, ilay mipetraka tao Ankadifotsy, efa voan’ny AVC, mitondra tehina sy efa malemy ny tànany ilany iny!Vao maty t@ herinandro teo tany @ hôpitaly hono fa victime n’ilay zavatra toy ilay nahazo ilay femme de ménage io koa, asa efa 15 andro  lasa izay! Vehivavy lehibe izany koa hono no namely azy! Teo ambony tetezana teo Behoririka indray no nanaovany azy. Narahany ilay rangahy, dia noresahany toy ny teo aloha, fa toa peratra volamena alliance koa angaha no nanaovan’ilay rangahy (olona efa malemy ila mitondra tehina mandeha irery koa moa ka mbola manao peratra volamena ihany !!tsy hoe mandatsa akory a!!), dia noresahan’ilay ramatoa teo, hono, dia nataony @ fanaovany azy koa, « ampiko ianao » hoy izy « fa ianao efa malemy io ve dia ho endahin’olona fotsiny eo mba mampalahelo », dia izy mihitsy hono no nanala ilay peratra teny @ ilay rangahy ka  nataony anaty sachet kely dia nasitriny tany @ harona sa kitapon’ilay rangahy angaha, dia hoe « io hitanao io tsara izy io a!ataoko ato fa jereo tsara! » Dia lasa izy nandeha! Fa nony tonga tany an-trano hono ilay rangahy nojerena ny kitapo sa harona fa tsy tao akory ilay peratra fa sachet kely vide nivoromborona no tao! Safotra teo ny anao lahy ka toa nihombo indray ilay izy efa voan’ny AVC teo iny ary tonga dia nampidirina hôpitaly, dia ni-« délire » foana andro vitsivitsy nanao hoe “dia ilay ramatoa iny ve no nahavita an’izao, tena tsy nampoiziko”,. Farany, maty t@ herinandro teo ilay rangahy, nivoaka t@ gazety ilay faire-part, tena hitako mihitsy, fa i D….. no niteny androany hoe « iny ilay rangahy mipetraka tao Ankadifotsy mitondra tehina mpiantsena irery iny!! »
Dia gaga fotsiny aho fa hitako teny Ankadifotsy foana tokoa izay rangahy izay fa mpiantsena eo @ bara vy eo foana, na t@ izy tsy mbola nalemy aza, dia izy irery foana no miantsena, dia elabe izy tsy hitahita, hay izany voan’ny AVC, fa nony hitako taty aoriana dia ilay malemy ny tànany ilany, ny tongony ilany koa ilay mitsipitsipika ireny dia izy lasa nitondra tehina, fa mbola miantsena irery foana….
Dia izay no tantara sy faits divers mamoa-doza tsy aritro mba tiko avoakanao […]! Tsisy lainga ireo ka izany no tokony amoahana azy fa manjary hanjakazaka izany ramatoa izany fa raha azoko tsara izany dia mifindrafindra toerana izy manao ny asa ratsiny, ary ny olona hitany mareforefo no tena ataony lasibatra!!

Fanamarihana: Nivoaka gazety Midi tamin’ny herinandro lasa ny Filazana manjo tamin’ny anaran’ilay rangahy mpampianatra, araka ny tatitra noraisina hatrany

 

Dia efa mahita asa hafakely tokoa ny sasany mba hahafahany mivelona an. Ao ny mivarotra amoron-dàlana, n y mivarotra am-pitsanganana, ary ao koa ny mampiesona. Misy sekoly fiofanana manokana ve sa nampiana-tena izy ireny? Asa re!

Safidy sy « Choix » dia Vazaha, hono, izy

Vazaha hono izy

Ny anabavin-draiko 30 taona no efa tany
fa tsy mba nanadino ny teny Gasy izany
ireo namako any am-pita
be koa no tafita
fa tsy nisy nanao azy ho valalan’alika
ny hafa kosa hono, taona 2 no vita
dia very tabilao mila tsy ho hita
na fiteny na fanoratra ny teny nibeazany
fa ny an’ny hafa indray no lasa tenindrazany
Avylavitra 09/ 04/ 2014 – 08h11 – Antsahavola

Safidy sy « Choix »

Moi, Tu vois,
cela fait deux ans, que je suis à Paris
à cause du taf et tous mes amis
la langue malgache, oh, j’ai vite oublié
tellement, tellement, c’est compliqué

Hay …
Fa tany amin’ny « Lyfr » angaha no sekoly ?
dia tao amin’ny « alliance » no niala voly ?
Sa nianatra tany an-tsekolim-bahiny
ka tena sahirana… tsy omena tsiny

Oh non, ça va
mon collège tu vois, c’était en plein Tana
c’était pas du tout, une école vazaha
c’était un CEG, le Square Poincarré,
à coté d’ «Annoussy » tu vois où c’est

Hay ,
Antanimbarinandriana, lalovako lava
rehefa hianatra, sy rehefa mirava
dia vita BEPC avy eo dia nankaiza
angamba sekolim-bazaha no nitaiza ??

oh que t’as une mémoire, c’était ça je crois,
« Antanimbari.. » quelque chose comme ça
eh ben, après, j »ai poursuivi,
au lycée d’en haut, au … lycée Gallieni

Hay …

et après le Bac, j’étais encore là bas
je « taffais » un peu à « Behoririkàh »
c’était là, que j’ai fait un peu d’économie
et puis après, je suis partie

Hay …

Cela fait deux ans, que je suis à Paris
je suis hôtesse de caisse, je travaille chez Tati
je m’intègre bien, et là ça va
surtout avec les cop’s, Silva et Nadia

Hay,
ny teny malagasy ve moa izany adino
toa sarotra ihany an, izaho aloha toa tsy mino
izaho izao taty, folo taona mahery
izaho miteny sy manoratra, tsy misy izy hoe very

oui, mais tu vois, je n’ai pas d’occasion
et en plus ce n’est pas important
même tu vois, quand il y a les soirées,
je n’y vais même pas, je ne suis pas intéressée

chacun son kif, chacun son truc
même si cette langue sera caduque
c’est pas mon souci, j’ai fait mon choix
tu veux, tu veux pas, c’est toi qui le vois

dia lasa aho nandeha tsy nanome tsiny,
nohajaiko ihany koa, fa safidiny iny
tsy hiteny betsaka aho, sao dia hoe masiaka
fa fiainany izany, izaho tsy hi »critique »

Raozigasy

Antananarivo #m2506 / 26 Jona (J-1)

Nivoaka kely nijerijery ny zava-misy tmain’ity harivarivan’ny 25 Jona 2012 ity ka izao no tsikaritra:

1* feno olona eny rehetra eny. Midika tokoa va re izany fa fety ny andro. Angamba, saingy ho ahy izay mpandeha amin’ireny arabe irny saika isan’andro vaky (Analakely, Behoririka, Ambondrona, Soarano, sy ny manodidina) dia niampy kely noho ny isan’andro no fahitako azy. Izany hoe niova, saingy tsy dia be loatra

2* Tery kokoa noho ny andavanandro araka izany ny àlna, na ho an’ny mpandeha an-tongotra, na ho an’ny mpamily toa anay. Satria dia zara raha misy faritra mitovy refy amin’ny fiara avelan’ireo mpivarotra mba hizorana.

3* Mbola voaporofo indray androany ny fanamparam-.pahefana ataon’ireo manana ny basy sy ny ‘lalàna’ any aminy.

Dia mbola hisy indray aloha ny tsy ho faly hamaky ny lahatsoratra fanakianana o ity fa dia ‘Akory atao eeee!’ izy no hita teny, ary dia tantarin’ny maso nahita.

Ndeha ny sary amin’izay no hampitenenintsika, ary arahana fanazavana kely manaraka azy tsirairay eny

Ny arabe midina etsy amin’ny farity Behoririka ity hitanao an-tsary ity. Jereo tsara ny faritra izoran’ny fiara.

Ilay arabe teo ihany saingy rhefa lasa izay fiara nandalo teo amin’ny faritra

Tsy hiala lavitra isika fa eo ambony kely eo fotsiny. Azonao jerena eto amin’ny sary ny elanelana misy ny sisin-dàlana amin’ny andaniny roa sy io mpivarotra mitorevaka anaty arabe io, ary iry mitsangana ery aoriana

Fiolahan-dàlana eo ambony eo ihany ity (Behoririka). Hiverenantsika ity faritra ity rehefa somary maizina ny andro

Mbola ilay fiolahana etsy ambony ihany, fa ny tiana haseho dia ny fahasahian’ity ramatoa mivarotra eo anatin’ny arabe, ary iretsy ampita izay mahatonga ny mpandeha an-tongotra hidina koa any anaty arabe

Ireo mpivarotra etsy ampitan’ilay ramatoa eo amin’ny sary etsy ambony, ary tena ao anaty fiolahana tanteraka

10 metatra miala ilay fiolahana tetsy aloha, raha hitodi-toha ho any amin’ny tsena Pochard

Mbola azo lazaina ho misy asany ve itony karazana mpitandro filaminana itony sa ‘espece en voie de disparition’ ? Ny karama anefa natao midangana, ny asa tanterahana tsy mandeha amin’izay andrasana, …Ntsss tsy alehany!

Ireo arendrina miandry mpividy eny an-.tsenan’Analakely

Hitodi-doha hiverina any Behoririka amin’izay indray isika

Mazava loatra fa tahaka ny amin’ny andro mazava, dia mbola mitoetra hatrany koa ny fitohanan’ny fifamoivoizana

Fa teto no tena nisehoan’ny tsy nampoizina. Nisy ity fiara nitondra mpitandro filaminana ity nisosososo avy any amin’izay niaviany tany. Tsy misy laharana izy io. Olona teo amin’ny 4 na 5 teo no tsikaritra tao anatiny. Nododosany daholo ny rehetra teo alohany. Ary raha voadonany aza ilay olona teo akaikin’ny fiolahana voalaza ery ambony, dia azo antoka fa tsy maintsy namoy ny ainy. Rehefa hitany fa nitohana tsy afaka nandeha intsony izy teo amin’ilay fiolahana dia ilay taxibe laharana 4885 TAJ teo alohany no nanalany ny fony.

Tsy tahotra tsy henatra fa raha vantany vao azony natao ny nilahatra tamin’ity taxibe dia ny fandrahonana sy ny vazavaza, ary ny fitakiana taratasy no nataon’ilay iray teo akaikin’ny mpamily. Azy tokoa moa ny fahefana, ary toa nanaiky nilefitra mora foana koa ity mpamily nanoloana ireto TOMPON’NY FAHEFANA ka dia nanome izay notakiany. Vao azony ny taratasy dia iny indray ity fiara fa niezaka ny handodona ireo teo alohany, nefa anie ka tsy afaka ny ho lasa lavitra akory e. Tsy maintsy nanaraka ny dian’ireo teo alohany mandra-pahatonga tery Antanimena ambany. Efa vesaran’ny fanomanana ny rahampitso va re sa inona no mampiasa saina e? Efa lasa ny taratasy vao tonga saina ny mpamily ilay taxibe fa na dia ny anaran’ireto naka ny taratasy, na ny laharan’ilay fiara aza tsy misy fantatra akory.

Eto dia fanontaniana no apetraka AN’IZA NY ANDRAIKITRA amin’ny fisian’ny fitohanana sy ny gaboraraka? Amiko dia tafiditra amin’izany daholo na ingahy Edgard RAZAFINDRAVAHY mitantana an’Antananrivo Renivohitra, ny ny POLISY mandray karama be nefa tsy alehany mameno ny tanàna, na ny mpitondra fanjakana tarihan’ingahy Andry Rajoelina toa faly MIJERY FOTSINY satria matahotra ny ho very seza raha sanatria hanakorantana ireto mpandika lalàna mameno tanàna ireto.

Mirary fety milamina sy anaty fiadanana ho an’ny rehetra amin’izao fahatongavan’ny fahatsiarvana ny 26 Jona izao. Niniako tsy tenina ny hoe #fahaleovantea (#Independance) satra toa mbola be loatra ny marika ahitako fa tsy tena mbola mahaleo tena ny taniko, dia i #Madagasikara  (#Madagascar)

++++++++++++++

Bilaogy miresaka fahaleovantena tsara mba topazanao maso koa ny ato izay ny namana Mamisoa no mitantana azy

Behoririka: Milamina hatreto

Hatreto aloha dia milamina ny eny Behoririka, ary efa samy manoko ny entany daholo tsy msy tahotra ny amin’izay mety ho asan’ny fivondronana ny mpivarotra amoron-dàlana

Irina ny hitohizan’izay filaminana izay. Saingy ny mbola olana dia mikatona tsy mivarotra ilay toeram-pivarotana VENIC niandohan’ny olana.Fiarabe roa feno mpitandro filaminana rahateo no miantsona manoloana ny toerana, miampy fiara tsy mataho-dàlana iray ety ambanimbany ety.

Voalaza moa fa noraisin’ny Ambasady an-tanana ny raharaha.

Indrto sary roa, ka ny voalohany dia nalaina omaly tamin’ny 17h mahery, ary ny faharoa dia nalaina io antoandro io ho fampitahàna

Mizotra ara-dalàna ihany koa ny fifamoivoizana. Na dia somary bebe koha izay aza ny mpandeha an-tongotra ka mihevitra ny tenany ho mafy noho ny vy. Nisy iray aza moa voadonan’ny Minibus Mazda teo anoloan’ny Firaisana Voalohany, ka tsy hay na maty na velona fa tsy nahatsiaro tena rehefa nakarina any anaty fiara.

Behoririka : Ahiana hivadika ho fankahalàna vahiny

Tsy zoviana amin’ny maro ny tiana lazaina amin’ny hoe fankahalàna vahiny, na xenophobie.

Feo nampivarahontsana re teny amin’ny manodidina ny gara Soarano sy ny Hotel Tana Plaza io androany hariva tamin’ny 5 ora hariva. Mbola tohin’izay niseho teny amin’ny VENIC Behoririka ihany.

Nisy ny fitaonana ireo gonim-pasika teo akaikin’ny gvavahadin’ny gara ka naparitak’ireto olona marobe ireto teo amin’ny arabe tsy lavitra teo. Efa nisy ny fanozongozonana fiara nandalo midina amin’iny faritra iny tamin’izay fotoana izay. Lehilahy vitsivitsy, 3 na 4 eo no miresaka eo afovoan’ny arabe manandrify ny gara. Hoy ny iray:

Aoka tsy hokitihana ny fananan’ny Malagasy, Fa izay fiaran’ny vahiny mandalo eo, ka miseho ho be monkon-doha, tonga dia haongana dorana eto.

Hatramin’ny fotoana nanoratana dia mbola voafefin’ny mpitandro filaminana ary tsy azo aleha ny faritra manodidina akaiky an’iny Behoririka iny, mba ho fisorohana ny mety ho fanararaotana sy ny mety ho fihoaram-pefy

Ho valin-kafatra noho ity fanaovana tsinontsinona ny mpiasa Malagasy ity dia nifafa ny kihony izay sinoa tratra teny an-dàlana teny. Tsy vao izao tokoa mantsy fa efa hatry ny ela no nahenona ny tsindrio fa lavo sy ny fanaovana habibiana avy amin’ireto kelimaso ireto.

Tsy dia nahagaga loatra ihany koa ilay fahatongavan’ny olona teny amin’ny nanaoloana ny gara Soarano, satria tao no nandositra niaraka tamin’ny fiarany ilay sinoa vendrana. Vendrana satria sady efanitsoaka, no mbola niseho vahoaka tao indray avy eo. Voatery noho izany, nanidy ny Café de la Gare ny tompony mab hisorohana izay sanatria.

Araka ny voalazan’ny vaovao tselatra tao amin’ny Radio Antsiva, dia milaza ity fampielezam-peo ity fa tsy nisy ny maty fa naratra tsaboina eny amin’ny hopitaly no misy.

 

Amin’ny 20h 15 izao eto Madagascar. Ity ny fanavaozam-baovao farany ananako hatreto:

Nanao fanambarana ny Masoivoho Sinoa ny amin’ny tsy maintsy hanolorana ny Fitsarana Malagasy ilay Sinoa nanao hadalàna tetsy Behoririka, ary miantso ireo teratany Sinoa rehetra eto Madagascar mba hahay miara-monina amin’ny Malagasy sy hanaja ny lalàna misy eto. Maniry koa ny Masoivoho Sinoa ny tsy hisian’ny akony ratsy eo amin’ny fifandraisan’ny Sinoa sy ny Malagasy avy amin’ity tranga androany ity.
Voalaza moa izany hatreto fa nahazo ny fitsaboana sahaza azy ny naratra. Misafotofoto araka izany ity vaovao ity