29 MARTSA, FAHATSIAROVANA INONA?

…66 taona aty aoriana: Toa zary mihena hatrany ny fahatsapan’ny Malagasy ny hasarobidin’ny LOVA izay napetrak’ireo zoky-raiamandreny…

Vao nifoha handray ny asako aho io maraina io, dia itsy voasoratra matavy etsy ambony itsy no hitako voalohany tao amin’ny pejy Facebook. Ny zavatra tonga tao an-tsaiko voalohany dia ny hoe: 29 MARTSA, FAHATSIAROVANA INONA? Ny resaka tao Moramanga ve?

Be ny ho taitra, ary misy mihitsy ny hiteny hoe: Sao tsy Malagasy ilay Manoratra? – Tsia, Malagasy, ary niezaka nanakatra sy nandinika izay kely mba nety ho takatry ny sainy tokoa. Ka inona ary no mba takatr’ilay saina kely niketriketrika tao e?

Izao:

Nitolona tokoa ny zoky-raiamandreny, tsy lavina izany. Tafita ve? Tsia no valiny. Noho izany TSY FANDRESENA no azo tamin’izay fotoana izay (1947)

Nandeha ny andro sy ny taona. Nitaky fahaleovantena ny firenena maro erantany, VietNam, sns…hatraty Afrika. Mba isan’ireny koa ireo zoky-raiamandreny teto Madagasikara.

Tonga ny 1960, notolorana sarintsarinà fahaleovantena i Madagasikara. Notolorana hoy aho, fa tsy hoe « nàka na nandrombaka » an! Dia io andron’ny 26 Jona ankalazaintsika Malagasy isan-taona ho andro nahazoana ny fahaleovantena io. Saingy….saingy…. fahaleovantena tsy nankararirary ny aina intsony ny fomba nahazoana azy, hany ka sady tsy nisy, tsy misy, ary tsy nasiana vidiny akory hatramin’izao.

Rehefa mijery ny làlana izoran’izay rehetra tonga eo amin’ny fitantànana ny firenena ny tena, dia toa mahita saribakolin’ny Ntaolo vazaha hatrany. Tsy anavahako mpitondra nandalo teto amin’ny firenena io, na iray aza, ary hatramin’izao vaninandro iainako izao.

Afaka ary ve isika ankehitriny sa sao mbola ao anatin’ny tolona mikatsaka fahafahana sy fahaleovantena marina e?

Manalasala toa vozon’akoho Shinoa hoy ny fitenin’ny eny amoron-dàlana. Rehefa jerenao ny fomba fisaina, ny fomba fanao sy ny zavatra rehetra mihitsy, miainga amin’ireo mpitondra milaza azy ho tia an’i Madagasikara, mandalo amin’ireo mpanao politika tsy manaiky ho gisitra amin’izany lazaina ho fitiavan-tanindrazana izany, ary mipàka amintsika vahoaka lazaina ho valalabemandry (tena mandry tokoa – ary ho darohan’ny sasany amin’ny fanafody famonoana valalabemandry atsy ho atsy), dia malahelo. Ny inona sa iza no iantefan’ilay alahelo?

Malahelo ity tanindrazana iombonana ity ny tena,

  • satria ny olony -na ambony na ambany, mahantra sy manana- dia samy milaza azy ho tia tanindrazana avokoa. -nefa raha ny fisaina sy ny fihetsika dia ny mifanohitra amin’izay. Faly mifanenjika sy mifanipaka an-kàrona, manimba ny efa mijoro, nefa koa tsy miezaka manorina ho an’ny taranaka ho avy. Tsy mahalala afa-tsy ny anio sy ny ho an’ny tena ihany.
  • satria izay mba notoloran’ny besinimaro fahefana, dia tsy manan-katao afa-tsy ny hamoritra sy hambotry ireo nametraka azy ho solotena (satria asa fisoloana tena sy fanompoana ny vahoaka ny asa maha-mpitondra)
  • satria mitombo isan’andro ny fahantrana ka mampanaotao foana ny maro, tonga hatramin’ny fivarotana ny tanindrazana sy ny mpiray rà amin’ny tena mihitsy aza
  • satria ezahan’ny vahiny ampifandrafesina ny Malagasy nefa tsy mety mahatsiaro tena (sa tsy te-hahalàla), jereo ny fifamonoana any Atsimon’ny Nosy. Ezahana tsy atao maresaka, ary anagadràna izay mba sahy miteny ny tsy rariny sy hitan’ny masony. Mitaraina ny mponina amin’ny fomba mamohehatra ataon’ny mpitandro tsy filaminana nalefa hampangiana ny tany (vahoaka) any an-toerana, noho ny fanaovana tsinontsinona ny hasina maha-olona, « rehefa tsy manao didin’ny besandry maka fananan’olona, dia manao ramatahora sy manolana », hoy izy ireo rehefa mba tafaresaka aminao. Mba henoy mangingina anie ny resaky ny olona rehefa mitakoritsika ireo tonga avy any atsimo ery amin’ny fasan’ny kàrana e!
  • satria vao mainka lasa manantena hatrany ny vahiny hamaha ny olany ny Malagasy, fa tsy mba mihevitra ny hanana ny fiandrianany sy ny fanapahankeviny manokana (izany tsy miteny akory hoe tsy ilaina ny miara-miasa amin’ny vahiny), ka angamba atsy ho atsy, na ny vady ho alainao aza, mbola ny vahiny koa no hanapaka hoe METY IO, na SOLOY FA RATSY.
  • satria raha izao no mitohy dia mizotra ho any amin’ny fifamonoana toy ny atsy Afrika sy ireo firenena nijabajabahan’ny vahiny ny Malagasy. Hifampitoroka toy izay nitranga tany Frantsa tamin’ny andro fanenjehana Jiosy, ary hifampitsimpona sy hifamaly faty avy eo, rehefa tapitra ny fotoanan’ny FISOLELAHANA sy ny HALAKO BIKA TSY TIAKO TAREHY, mandra-pisindan’ny alahelo sy ny fifankahalàna vaovao ezahana volena eo aminy
  • satria efa tonga eto Madagasikara ny mpanani-bohitra vahiny, saingy tsy misy taitra ny maro, fa toa ny hanan-taranaka amin’izy ireny aza no hihazakazahan’ny sasany (sitrany ahay mba mihatsaratsara bika ny taranaka e!)
  • ….

Mbola be raha ny alahelo no hotanisaina, fa ndeha hiverenana ny fanontaniana ery ambony hoe 29 MARTSA, FAHATSIAROVANA INONA?

Valim-panontaniana: 
Ny valiny ho ahy dia FAHATSIAROVANA FAHARESENA, tsy misy afa-tsy izay. Amiko izany raha ny marina dia tokony ho andro fandinihan-tena sy fisaonana isan-taona no atao anaran’izy io fa tsy ho fety firavoravoana. Fahafatesana, hirifiry ary fiondrehana teo anatrehan’ny vahiny no nisy tamin’io andro io, koa tsy dia mendrika loatra hatao ho andro firavoravoana. Tsy mahatsiaro tena ho ataon’ny frantsay ho fihomehezana va re isika e? Indrisy !

29 Martsa 1947

Sary nalaina tao amin’ny pejy Facebook-n-ny https://www.facebook.com/MadagascarHier

 

Na ny 26 Jona aza dia mbola ametrahako fanontaniana toy izay ihany koa, saingy efa  » nentin’ny teo aloha, ka ombako tsy mahazaka ihany koa e!  » Fa raha ny sitrapo, dia mbola mitady datin’andro hafa ho tena hatao rakitry ny tantaram-pahaleovantena MARINA aho io.

Azafady raha nanafintohina anao ny lahatsoratro, fa izay aloha no fahatsapana niainga avy ao anatiko ao vao maraina tamin’ity 29 MARTSA 2013 ity

Ho entiko mamarana azy dia ireto fanehoan-kevitra notsongaiko avy atsy amin’ny Facebook:

firy amintsika no sahy sy hanana ny fitiavan-tanindrazan’ireo maty tamin’ny 47. … Andao hiaraka haningotra sy hanafongana ireo mpanao politika mpitsetritra sy mpanandevo ny malagasy. Maninona tokoa moa raha mba atao anaty wagon iray ireo dia mba tifirina ho faty any e! « ho mba lasa mahery fo, maty ho an’ny tanindrazany »!
Miarahaba antsika rehetra indray. Mahatsiaro ny 29 marsa isika anio, inona avy ireo endrika fitiavan-tanindrazana efa nasehonao ary mbola tokony hasehonao amin’ny tanora namanao?

Opération Smile – Septambra 2013 indray no fotoana

Fampitam-baovao avy amin’ny CPM ANTSAKAVIRO – 18 Marsa 2013

Hiverina amin’ny volana septambra indray ny “Opération Smile” nandraisan’ireo “volontaires” ao amin’ny Corps de la Paix/ Madagascar anjara

Tapitra androany ny ny hetsika ara-pitsaboana “Operation Smile” nandraisan’ny ireo mpiasa an-tsitrapo na “volontaires” ao amin’ny Corps de la Paix/Madagascar miisa iraika ambin’ny folo mianadahy anjara tao amin’ny hopitaly Ravoahangy Andrianavalona. Nahatratra 177 ny isan’ny fandidiana natao nandritra ny efatra andro sy tapany. Ny iraka ataon’ireo mpitsabo vahiny miisa enina avy amin’ny firenena isan-karazany nandritra ity “Operation Smile” ity, dia ny fandidiana maimaimpoana ireo zaza malagasy sy olon-dehibe sima na koa manana fahasembanana eo amin’ny endrika mba ahafahan’ireo mitsiky toy ny olon-drehetra indray.

“Tena nahaliana ahy ny nanampy ireo mpitsabo nandritra ity hetsika ity satria hanohy fianarana momba ny fitsaboana aho rehefa vita ny asa an-tsitrapo ataoko eto Madagasikara,” hoy Raphael Macri, “volontaire” amerikana ao amin’ny “Corps de la Paix/Madagascar tamin’ity Operation Smile ity. “Tsy vitan’ny mandika teny fotsiny ny asanay fa noho ny fahafantaranay sy niainanay niaraka amin’ny Malagasy dia afaka mampahery ny marary izahay ary manampy tsara ireo dokotera vahiny.” Mafimafy ihany ny asa satria maharitra adiny 12 ora vao misolo indray ny ekipa ary niloa-bava mihitsy ny dokotera, hoy Raphael Macri, fa tsy nahavita ny asany izy ireo raha tsy teo ireo “volontaires.”

Ny andraikitr’ireo mpanampy an-tsitrapo avy amin’ny fikambanana samihafa tamin’iny “Operation Smile” iny, ahitana Malagasy sy Amerikana, dia ny fandraisana sy fanomezana torolàlana ny marary amin’ny fahatongavany ao amin’ny toeram-pitsaboana; fandikana teny avy amin’ny anglisy amin’ny teny malagasy; fanazavana ho an’ny marary ny zavatra hatao azy ao amin’ny efitra fandidiana ary fanampiana amin’ny alàlan’ny fanomezana sakafo ny ankizy rehefa vita ny fandidiana.Androany dia mbola niasa ireo “volontaires” nandray ireo marary nodidiana tamin’ny herinandro lasa ka nasaina niverina. Amin’ny volana septambra dia hiverina ny “Operation Smile” ka any Toamasina indray no hanaovana ny hetsika, izay indray mandeha isan-taona ihany teo aloha.

Ezaka iraisam-pirenena ny “Operation Smile” ary tanterahina maneran-tany any amin’ny faritra sahirana sy an-dàlam-pandrosoana. Mahatratra hatramin’ny 60 ny isan’ny mpitsabo mandray anjara maimaimpoana, manolotra ny fahaizany sy ny fotoanany manatanteraka fandidiana amin’ny ankizy. Miara-miasa amin’ny toeram-pitsaboana amin’ireo firenena hivahinianany ny “Operation Smile” ary ny tanjony dia tsy vitan’ny hoe mamerina fotsiny amin’ny laoniny ny tsiky eo amin’ny ankizy tratry ny fahasembanana eo amin’ny endrika fa mizara koa traikefa amin’ireo mpitsabo eo an-toerana, mamela fitaovana fandidiana ary manorina fiaraha-miasa manara-penitra mba hisian’ny fivoarana sy fahavitan-tena aty amin’ny tany an-dàlam-pandrosoana.

sMILE2012 195
(Sary: anjara asan’ireo volontaire koa ny mampifalifaly sy manary dia ireo ankizy andeha hodidiana na efa vita fandidiana)

Mitokona indray ny BFV/SG

Ho zendana indray izay tsy mahalala androany fa hoe mitokona mitaky fisondrotan-karama 13% ny mpiasa ao amin’ny #BFV-SG #Madagascar

Nantsoina hanatevina laharana ety Antaninarenina daholo koa ireo mpiasa rehetra any amin’ny zana-tsampana. Inona re no hitranga androany e? Haharitra mandra-pahoviana indray koa izy ity?

Mazava loatra fa ny mpanjifa hatrany no hihinana ny tadin’ny fanitsaka amin’izay fandehany eo. Koa mahaiza mitsitsy ny eo an-tànana aloha fa sao sanatria mbola amin’ny fotoana tsy voafetra izy ity vao hifarana

Indreto sary vao maraina atolotra anareo

DSCF0732

DSCF0733DSCF0734