Antananarivo Miblaogy 7 – HdO Le Bus Antanimena

Sahala ny efa fanaon’ireo mpitoraka bilaogy (bloggers) hatrizay, dia tonga teo amin’ny andiany faha-7 ny Antananarivo Mibilaogy. Zavatra izan’ny nampiavaka an’ity omaly ity ny namoahana voalohany ny tenifototra (hashtag) ho famantarana ny hetsika: #antambl . Ny Antananarivo Mibilaogy izay fotoana iray hihaonana mivantana ho an’ireo rehetra mpikamentsona any anaty tontolon’ny serasera any. Mitovy amin’ireno antsoin’ny Amerikana hoe ‘After Work’ irony no fomba fanao amin’izany. Tsy mialonjafy ny hetsika, ka na iza ianao, na iza te-hanatrika ny karazana fihaonana toy itony, dia asaina an-tanan-droa.

Toerana nofinidy hifamotoanan’ny maro ny tetsy amin’ny  HdO – Le Bus Antanimena.

Tsara ny toeram-pandraisana, toy ireny tany amin’ny trano fandraisana vahiny manokana irny ny rehetra. Ary isaorana etoana ny fanomezana maimaim-poana ny  fahafahana niserasera tamin’ny aterineto tamin’ny alalan’ny WIFI, izay raha somary nihisatra kely teo am-piandohana, dia nisosa tokoa fotoana fohy taorian’izay.

Nalalaka ny serasera. Fitaovana samihafa no azo nampiasaina. Jereo anie e: tsy manala hoho akory io namana iray io fa fitaovan-tserasera finday no ao an-tànany ao

Isan’ny toetra iray niavahan’ity andiany iray ity ny hafanam-pon’ireo mpandray anjara tamin’ny fifanakalozan-kevitra tanaty loha-hevitra samihafa. Tsy misy ny lohahevitra voafaritra mialoha horesahana, fa eo vaomifanentana ny amin’izay mahaliana ny tsirairay. Endrika iray ananan’ny Antananarivo Mibilaogy koa izay. Voaresaka nandritra izany, na ny resaka manodidina ny teknolojia avo lenta, na ny fomba hahafahana mitrandraka ny bilaogy hitondra tombontsoa ho an’ny tompony, na ny mikasika ny fiainana amin’ny ankapobeny. Tonga hatramin’ny fampitahàna ny zava-misy eto amin’ny firenena amin’ny zava-misy any ivelany eo amin’ny lafiny fampandrosoana (I Jean Marc niresaka mikasika ny fomba nataon’ny Sinoa teo amin’ny lafiny fanabeazana). Hita tao ny lafiny rehetra eo amin’ny valan-tserasera samihafa (mpikarakara na mpampahafantatra lanonana sy fivoahana mitety tànana, ny mpitoraka bilaogy noho ny fitiavana manoratra fotsiny amin’izao, sns…Ary ny tena nanamarika ahy manokana dia ny fifandresen-dahatra teo aminay telo mirahalahy (Thierry – HeryZo – Avylavitra) mikasika ny handikana ny teny hoe ‘tweet’ ho amin’ny teny Malagasy: izaho nandroso ny hoe ‘bitsika’ na tazonina ho tweet ihany mandra-paha…HeryZo nametraka ny hoe ‘te-ho-hita’…Tanaty tokiky  lavareny no nifanakalozana hevitra momba an’io saingy hatreto aloha dia tsy mbola nisy hevitra matotra tapaka. Arosoy etoana raha misy hitanao mpamaky fa azo andikàna azy io. Saiky tsy nifarana mihitsy aza izany raha tsy nanery mafy ny hanoanana.

Tanaty fifanakalozana feno fifanajana sy firahalahiana tanteraka, toy ny hoe mpianakavy tafahaona no nifampitafàna, ary taorian’ny nandaozana ny HdO Antanimena dia nirodorodo namonjy ny Look’s Andravoahangy ny rehetra mbahiara-misakafo.

Tsy naka sarotra ny rehetra fa teny amoron-dalana ihany dia efa vita ny fivoriana maimaika nanapahana ny andron’ny 25 Febroary hanaovana ny fihaonaa manaraka.

Raha maro sy nazoto tamin’ny fandraisana fitenenana ny tsirairay omaly dia inoana fa tsy ho ambaka an’izay ny amin’ny manaraka. Nipoitra tamin’io fotoana namaranana ny diniky io aza ny soso-kevitra naroson’i JeanMarc Rolland hoe azo atao ny manao LiveStreaming mba handraisan’ireo tsy afa-manatrika anjara fitenenana raha misy tiany holazaina. Ny indrokelin’ny mpandrafitra amin’izay dia sao hanova ny endrik’ilay Antambl (mihaona vatana) izay hevitra izay, ka hiandry fotsiny any ambadiky ny fàfana any ny maro. Hafa ihany mantsy ilay mifanatri-tava.

Isaorana etoana i Andrydago namorona ny tenifototra, ary tsy adino koa ny maneho fisaorana anareo rehetra tonga namaly ny antso. Isaorana toy izany koany HdO Bar   Le Bus Antanimena nampiantrano.

Mankasitraka indrindra.

Ary entina hifandaozan dia ndeha hiaraka hitsiky amin’ireto harona hafakely ireto

Eeeeeeeh! Harona ireo fa aza ratsy saina eo an!

Voaray ny taratasy nalefan’i Lt Cl Charles Andrianasoavina

Misy ny dika fenon’ilay ambara ho taratasy nalefan’i Lt Cl Charles Andrianasoavina eto amin’ny Gazety_Adaladala amin’izao fotoana. Efa nisy ny sombiny navoakan’ny gazety an-tsoratra mpiseho isan’andro manerana an’i Madagasikara omaly.

Noho izy io miaty anaran’olona maro dia maro anefa, dia miala tsiny indrindra raha tsy mbola afaka ny hamoaka azy manontolo ny eto amin’ny Gazety_Adaladala (raiso ho hadalany izany) satria inoana fa efa nahazo izany koa ny manampahefana isan’0ambaratonga 8raha hanao ny asany ara-dalàna, mazava ho azy)

Miankina amin’izay tohin’ny fanadihadiana no hamoahantsika izany eto na tsia. Amin’ny endriny PDF ilay hafatra.

Mitantara ny antsipirihan-javatra niainana taloha, nandritra ny fanatanterahana ary tao anatin’ireny krizy mbola manao randra-mitarika hatramin’ny anio ireny izy io.

Halamintsika ho toy izao ny hamoahantsika azy angamba raha sitrakareo. Mandra-pahita ny tena fahamarinan’izay zava-boalaza ao anatiny, dia hosoloina litera tokana toy ny A B C D ny anaran’olona tsirairay ao anatiny fa ny sisan’izay dia hajanontsika araka izay tao anatin’ilay « ambara ho taratasy nalefan’i Lt Cl Charles Andrianasoavina mikasika ny raharaha Andry Rajoelina sy Marc Ravalomanana ».

Rehefa vitantsika izay fikarakaràna manokana izay dia havoakantsika eto ny vokatra. Mba hodinihana sy  ho tsakotsakoina ary hifampizarana izay mety ho fanehoan-kevitra avy amin’ny tsirairay

Mahareta kely…

Fanambaran’ny GTT International 01

Fanambaran’ny GTT International 01

Taorian’ny famoahana ny fakàna am-bava an’i Emile Ratefinanahary tao amin’ny Gazety Tia Tanindrazana (10.01.2011) izay nilaza fa manohana ny antoko mihilana TIM-Raharinaivo ny mpitolona GTT, dia mitsipika mafy izany filazàna izany ny biraon’ny GTT International 01 (mizaka ny faritra Ile-de-France) ary manamafy fa :
– ny GTT International 01 dia tsy manohana velively ny antoko mihilana TIM-Raharinaivo
– ny GTT International 01 dia manohana ny ‘mouvance’ Marc Ravalomanana
– ny GTT International 01 dia miady ho an’ny fiverenan’ny ara-dalàna sy ny fiverenan’ny filoha Marc Ravalomanana an-tanindrazana.
Nahatsiaro voafitaka ny mpikambana. Ity mpitolona, izay isan’ny mpikambana koa, ary nanohana mafy ny filoha Ravalomanana teo aloha, dia nisafidy ny hankany amin’ny antoko TIM mihilana tarihan-dRaharinaivo, izay miara-dia amin’ny ireo mpanongam-panjakana mitodi-damosina ny fifanarahana tohanan’ny vondrombe iraisampirenena.

Paris, faha-15 Janoary 2011
GTT International 01
Maison des Associations
8, rue du Général Renault – Paris 11e
Ny birao
Abraham Olivier
Harison Feno
Harison Laurette
Radanielina Holy
Rafidison Jean Philippe
Randria Fano
Rasamoely Henri
Ny mpikambana nangataka ny ametrahana ny anarany
Paule Saholy
Rafidison Noro
Randrianasolo Antoine
Ratiarivelo Christophe

*******************************************************

Communiqué du GTT International 01

Faisant suite à une interview d’Emile Ratefinanahary parue dans le journal Gazety Tia Tanindrazana (10.01.2011) annonçant que les militants GTT soutiennent la branche dissidente du parti politique TIM-Raharinaivo, le bureau du GTT International 01 (occupant la région Ile-de-France) rejette avec force cette affirmation et réitère que:
– le GTT International 01 ne soutient en aucun cas la dissidence TIM-Raharinaivo
– le GTT International 01 soutient la mouvance Marc Ravalomanana
– le GTT International 01 se bat pour le retour à l’ordre constitutionnel et du président Marc Ravalomanana à Madagascar.
Les membres de l’association se sont sentis trahis. Cet ancien militant ardent défenseur du président Ravalomanana, également membre de l’association, a rejoint la branche dissidente TIM qui a décidé de s’associer aux artisans du coup d’état de mars 2009, tournant le dos aux accords reconnus par la communauté internationale.

Areti-mifindra ilay fandoroana tena

Nandoro tena ny tovolahy Toniziana iray . Vokany, nikorontana ny firenena iray manontolo, ary dia nirodna ny fitondran’i Ben Ali

Efa nisy ny nanahy fa hanao randra-mitarika ity raharaha Toniziana ity, ary dia nanontany mihitsy hoe : « Iza ny manaraka? »

Ary dia nisy indray tokoa izao ny nandoro tena teo anoloan’ny Antenimiera tany Ejipta, efa nisy nanao koa tany Maoritania, ary efa nisy nanandrana tany Alzeria.

Sahiran-tsaina ny mpitondra Ejiptiana, fa toa lasa areti-mifindra ilay fandoroana tena. Endrika vaovaon’ny fanoherana, ary fomba fanehoan-kevitra amin’ny endriny faran’izay henjana.

Mahavita zavatra tokoa ny olombelona rehefa tonga amin’ilay hoe « feno ny kapoaka » an!

Izany rehetra izany dia azonao jerena avokoa ao amin’ny tranonkalan’ny Global Voices Online (Malagasy, Anglisy)

Ben Ali sy Tonizia (Tunisie)

Raharaha isan’ny nafana sy narahana be tato anatin’ny efa ho 5 herinandro izao ny tao Tonizia sy ny ho fiafarany: tonga tokoa ny farany ka dia nandositra nanao sesitany ny tenany ny filoha Ben Ali ary lasa nialokaloka any Arabia Saodita.

Resaka talantalana fivarotan-boankazo syu anana nalain’ny mpitandro filaminana, ka nitarika tamina famonoantenan’ilay tovolahy 26 taona hany mamelona ny tokantranony, ahitana ny reniny sy ny iray tampo aminy, no nampiorodana ny fanjakan’ingahy Ben Ali nandritra ny 23 taona. Ary ireo famoretana nataon’ny polisy tamin’ireo mpanao fihetsehana

Mampahatsiahy tantara tsy zoviana amintsika izany. Tamin’ity raharaha Toniziana ity dia nisy tamin’ireo mpitoraka tweet no nilaza fa pitik’afo mandrehitra hatezeram-bahoaka ny hanoanana. Efa nahavoa mpitondra maro tokoa izany. Ary be ireo milaza fa ohatra halain’ireo firenena Arabo maro i Tonizia atsy ho atsy ka ho isan’ireny i Ejipta sy Libia, ankoatra ny hafa. Isan’ny fitaovana ambara ho nandray anjara betsaka sy nitondra anjara biriky tamin’iny zava-nitranga tany Tonizia iny ny teknolojia vaovao toy ny Bilaogy (Blogs) sy ny Twitter.

Rehefa tafitan’ireo vahoaka ny tolona nataony dia nifety ny olona. Nisy Libane nampitandrina ihany anefa sao dia mifety tsy afa-tavony ny Toniziana.

Ary ny vahoaka Malagasy, mba manao ahoana?

Raha te-hamaky misimisy kokoa amin’ny zava-nitranga tany Tonizia amin’ny teny Malagasy ianao dia tsidiho eto.

Extradition de Ravalomanana

Et oui, l’Afrique du Sud a décidé d’en finir avec cette épisode « HAT vs Ravalomanana »  en invitant ce dernier à quitter son territoire. Mais les questions qui se posent sont: Pourquoi avoir attendu? Est-ce le ‘plan B’  de la communauté internationale, comme quoi, si les autres tentatives d’hier ont tous échoué, celle-là pourrait être la bonne pour qu’il puisse rentrer au pays et participer aux élections qui se profilent à l’horizon?

Tout le monde se souviendrait du refus de l’Afrique du Sud de coopérer avec ce régime HAT. La HAT qui a demandé aux Sud-Africains l’extradition de Marc Ravalomanana.  Mais une fois que la Commission de vérification des pouvoirs au sein des Nations Unies ait accepté l’’accès du Président de la Haute Autorité de la Transition aux tribunes de l’ONU, booom…tout a changé d’un coup. Une nouvelle page de notre histoire s’ouvre…

Il y a anguille sous roche!

Ho an’i (enylesyagmail.com)

Tsy dia fanao loatra teto amin’ity bilaogy ity ny mandefa hafatra manokana ho ana mpitondra fanehoan-kevitra iray voafaritra, saingy amin’ity indray mitoraka ity dia hiala kely amin’ny mahazatra isika ka hitondra taratasy misokatra.

Misaotra anao mitondra fanamarihana tao amin’ny resaka FPVM navoaka teto. Indro apetrako etsy ambany ny ampahany amin’izany. Ny mpanoratra dia i enylesya

…. Ngah lty fanaovangazety ity ataotao foana tahak’izao! mba misy fianarana ange lesy atao vao manao an’itony na dia ho mitarika ady hevitra fotsiny aza e! na ny mpmaky n’la aza tsy voafehyn’la dia sujet sensible ohatr’itony no ilangalangana!! Tss

Ny tiako hotsipihana kely fotsiny dia ny hoe, ny tena lehilahy dia tsy miafina ambadika adiresy mailaka antsoina amin’ny teny vahiny hoe ‘bidon’ tahaka io ataonao io. Na izany aza dia tsy nampaninona ny teto amin’ny Gazety_Adaladala ny namoaka ny fanehoan-kevitra avy amin’ireny olona tsy sahy miseho masoandro toy ny vorondolo ireny.

Ny olona afaka miditra an-kalalahana amin’ny aterineto toa anao izao dia afaka tsara mahafantatra ny fisian’ny antsoina hoe ‘blog’. Ianaro aloha ny dikan’io teny io vao mitondra fanakianana amin’ny manaraka.

Na iza na iza dia afaka manokatra blog avokoa ary afaka manoratra izay tiany hapetraka ao. Malalaka be ny lohahevitra sy ny fomba fijery azo entina amin’izany. Eny fa na dia ny tantaran’ny alikanao sy ny sariny aza no tiana havoaka ao, tsy olana izay. Na ny sarim-pianakavianao sy ireo sipa marobe efa notetezinao teo amin’ny fiainana aza, ny isan-jaza an’elakelan-trano mety ho efa vitanao. mbola tsy olana koa izany. Tsy misy mihitsy afaka hanakana anao raha aty anaty blog koa no hitanisanao an’zany. Anao manokana izany ary safidinao ny hanoratra mikasika zavatra iray araka izay heverinao ho fahitanao azy, na tsia.

Marina ny teninao, fa tsy nataotao foana ary tsy ataotao foana ny asa fanaovan-gazety. Koa aleo hamafisina indray fa angamba tsy mbola mpanaraka ity blog ity hatrany am-boalohany (2008)  ianao: TSY MISY MPANAO GAZETY MIASA ATO AMIN’NY GAZETY_ADALADALA, ary efa nahadiso hevitra olona maro io, na dia efa nisy foana koa aza tany aloha ny fitondrana fanazavana. Ary aoka ho fantatry ny maro fa matoa antsoina manatrika ireny fihaonana karakarain’ny fikambanana iraisam-pirenena ireny ny eto, dia amin’ny maha-blogger azy fa tsy amin’ny maha-mpanao gazety. Miainga avy amin’ilay famaritana (ny atao hoe blog)  izay anentanako anao mba hotadiavinao no fomba anoratana ny zavatra rehetra eto amin’ity bilaogy ity, fa tsy manaraka velively ny fitsipiky ny asa fanaovan-gazety (ilay antsointsika hoe Mainstream media’) mety ho ao an-tsainao akory. Tsy misy ligne éditoriale tsy maintsy harahana eto, na patron de presse tsy maintsy eken-teny. Tsaratsara ho anao araka izany ny mandalina bebe kokoa ny atao hoe ‘blog’ dia mety hazava aminao ny resaka.

Raha ny anarana entiny indray no mety mitondra anao any amin’ny hadisoana (ilay hoe GAZETY_ADALADALA) dia tanim-boanjo io. Tsy zoviana aminao ny fisian’ny antsoina hoe ‘journal intime’. Inona no soratana ao anatiny ao? Anao no mamaly an’izay. Amin’ny Malagasy sy ny Anglisy  dia antsoiny hoe Diary izy iny. Fa moa ve izany mahatonga ilay journal intime ho tsy maintsy ho heverina ho toy ny gazety (ilay asa maha-matihanina ny hafa) famakinao isan’andro sy araka ny andraisanao azy? Tsia avy hatrany no valiny.

Sehatra midadasika be araka izany ny tontolon’ny ‘blog’ ka tsy azo ferana, na amin’ny vontoatiny, na amin’ny anarany.

Fitaovana iray lehibe eo ampelatanan’ny olon-tsotra tsirairay ankehitriny ny ‘blog’, ary efa samy mahatsapa izany daholo na ny Mainstream Media (ndeha hataontsika hoe Gazety nentim-paharazana) nolazaiko ery ambony, na ny mpitondra fanjakana; raha fintinina amin’ny teny fohy dia ny manan-tsaina rehetra eee!

Izany no mahatonga ireo gazety mpiseho isan’andro efa mametraka koa ny tsanganana ‘blog’ any anatin’ny tranonkalan’izy ireny.

Momba ny resaka hoe voafehy na tsy voafehy ny fanehoan-kevitry ny mpamaky dia tsotra no hamaliana anao: rehefa mitsidika ny tranonkala hafa misy adihevitra mafana ireny ianao, na tranonkala tsotra io na ny an’ireo antoko politika samihafa mifanenjika eto amin’ny tany sy ny firenena, mba ampitahao ny zava-mitranga sy soratana ka avela hivoaka hovakian’ny rehetra any amin’izy ireny, dia ampifandanjao amin’izay hitanao misoratra ato, fa raha mahita teny manevateva sy teny ratsy ianao, isao hoe firy no hitanao tany, ary firy amin’izany no misoratra ato.  Fepetra isan’ny mahasarotiny ny eto izany, ka na misy aza amin’ireo efa mpitondra fanamarihana nahazo alalana hivoaka avy hatrany rehefa manoratra eto, no tratra manao fiteny tsy mendrika, dia mazava ho azy fa dia esorina avy hatrany ny fanehoan-keviny ary na izy aza tsy ho afaka mametraka fanehoan-kevitra eto intsony amin’iny anarany iny ( raha tsy hoe hanao bidon toy io anao io indray mandra-paha…)

Hamaranako azy dia ity: tsy misy fanavahana ny fanehoan-kevitra eto amin’ity blog ity fa rehefa atao am-panajana tsy misy tenim-boto dia afaka avoaka avokoa. Rehefa mihaino vata fampielezampeo aho ka tsy tiako ny mihaino izay fandaharana mandeha ao, dia ovaiko fotsiny ny onjam-peo. Toy izany koa, raha tsy dia mety loatra aminao ny mamaky ny hadalako eto (araka ny anaran’ity blog ity), dia mijere rohy hafa fa tsy andoavanao volabe akory izany, tsy mahafaty antoka anao velively. Ary amin’ny manaraka mba ezaho tadiavina ny fomba  hanafenana ny adiresy IP-nao  fa aza dia aely tahaka izao, eny fa na dia ny fomba firesakao aza dia fantatro fa olona akaiky ahy isan’andro ianao. Auteur : enylesya (IP : xx.xxx.x09.129 , xxx-x09-129.blueline.mg). Niniana natao xxx ireo marik’isa sasany fa efa hainao ihany tsinona.

Misaotra ihany anefa na izany aza