Vetso.serasera.org

Maro ny takelaka azo tsidihana ao amin’ny vohikalan’ny SERASERA.ORG, fa notsongaiko manokana ny VETSO.SERASERA.ORG.  Sehatra iray ifanenan’ny kanto Malagasy sy ny mpankafy azy izy io.  Tsy natao ho an’ny matihanina irery anefa ny fandraisana anjara ao, fa na ianao mamaky ity hafatra ity aza dia afaka mametraka izay vetsovetsom-po na aingam-panahy sendra nandalo taminao ka noraiketinao an-tsoratra. Iza no mahalala, mety ho izay soratra kely napetrakao izay no hitondra anao ho amin’ny sehatra avo atsy aoriana.

Manerana ny vazan-tany rehetra no nipoiran’ny kanto voarakitra ao amin’ny VETSO.SERASERA.ORG, ary maroloko sy tsy mialonjafy ihany koa.

Isan’ireo nametraka ny kanto avy aminy i Raozigasy, ary tena nitondra fofona namerovero tonga hatraty anaty fo sy fanahiko koa, ka dia zaraiko aminao.

Manentana anao aho mba handalo kely amin’izany takelaka izany, na dia ho minitra vitsy monja aza fa tsy hanenenanao ny mahalala fa hay marobe ny Malagasy no mànana talenta, ary marobe ny Malagasy no mbola mitàna tsara ny fomba fanoratra sy ny tsipelina nolovainy.

Indro ary atolotra anao izay vokatry ny tany entin’i Raozigasy:

=========>  ZARAO ETO

Zarao eto ny alahelo nokotrehim-po voadona
Zarao eto ny hadisoana rehefa iny ianao nifona
Zarao eto ny hatezerana, sy ireo otri-balifaty
Dia hihamaivana ianao, raha mivoaka ireo tsy tanty

Zarao eto ny hafaliana, mampitsiky izany tava
Zarao eto ilay fitia, mampisioka izany vava
Zarao eto izany vetso sy embonembona fitia
Dia ho faly ny tontolo, ka an-tsiky no miria

Zarao eto ny hetaheta, ao anatinao mangina
Zarao eto izany nofy, sy hasambarana ho zina
Zarao eto ireo kinasa, novetsoina hotanteraka
Dia hisinda avokoa ireo asa saina izay mandreraka

Zarao eto ireo fijery, sy fahitanao ny tontolo,
Zarao eto na dia hevitra, heverinao fa hoe bontolo
Zarao eto ny fisaina, fibanjinanao ny ho avy
Dia hivadika traik’efa, lesona ho an’ny mpianakavy

Zarao eto ireo kanto, nataonao tsiambararoa
Zarao eto ireo talenta, ho soratra sy masoivoho
Zarao eto ireo fahaizana, izay harenanao miafina
Mba ho kanto malagasy, irin’ny sasany ho tahafina

http://vetso.serasera.org/news/raozigasy )

Isaorana manokana i Raozigasy tamin’ny namelany ny hametrahana ny asa sorany teto.

3 Réponses

  1. Misaotra ny mpikarakara amin’ny fanapariahana ny teny sy ny tononkalo malagasy

    Raozigasy sy ny tononkalo malagasy dia « lamban’akoho ka aina no fetra »

    « Tononkalo malagasy »

    Ianao ry tononkalo, no namako sy arofaninko
    Ianao ry soratsoratro, no fefy miaro ireo vinaniko
    Ianao ry diam-peniko, no lalam-piainana alehako
    Ianao ry teny mamiko, no tabiha sy reharehako

    Ianao ry teny malagasiko, no fizarako ny hetaheta
    Ianao ry teny kanto indrindra, no nahatonga ahy ho poeta
    Ianao ry teny izay tsy foiko, no fizarako irony vetsoko
    Ianao ry teny tonga lafatra, no hitantarako izato sentoko

    Ianao ry teny nolovaiko, no tena tenin-dreharehako
    Ianao ry teny holazaiko, no anambarako ny firehako
    Ianao ry teny manan-jina, no manasina ny vavako
    Ianao ry teny feno haja , no mamatotra ahy sy ny havako

    Koa ny toky omeko anao, ry tononkaloko ry teniko
    Ny voady ataoko aminao, ry kanto lova avy amin-dreniko
    Dia matokia hatrany ianao, raha mbola tany koa ny tany,
    Fa tokana ny Teny tiako, ilay Teny Malagasy izany

  2. mba tiako loatra ny fomba fanoratr ity namana ity.Tohizo fa tena tsara sy manangoly ny any anaty any.

    • Mamoha ny fo mbola rendriky ny torimason’ny fiainana ny asa soratra vokarin’ny Raozigasy ka irariana hatrany ny hirosoana lalindalina kokoa ary enga anie hanabe voho ny tononkalo malagasy.

      Indro ary tononkalo iray nosoratako ho antsika
       » DISO FIANTEFA »
      Nankaiza ny vetso ny hirako omaly
      No sento no indro ireo mampijaly!
      Gina ny feoko tsy afa manoatra
      Voafonjan-tomany be tafahoatra

      Ozoniko ve sa ankahalaiko
      Ny andro nahitako anao sombiniaiko
      Ny vintana ve no ratsy sa ny anjara
      Fa famoizam-po no fiafaran’ny tantara!

      Ry voninkazo mamiko koloiko mamboko
      Tsy nampoiziko ho ianao no handratra ny foko
      Tokana manko toa siny ny fitiavako
      Ianao no kintana sy harena ary havako

      Indrisy fa nataonao sangy mahery
      Betsaka ny maso tsy afa-mijery
      Rotika ny saina hatrany anaty fanahy
      Lasa kamboty tsy misy mpiahy

      Ianao no tanjona hitodian’ny ho aviko
      Nantenaiko ho solon-dray sy anadahiko
      Andry hijoroan’ny fanantenana rehetra
      Kinanjo fahoriana tsy hita fetra

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s

%d blogueurs aiment cette page :